927 Бардыгы /

Европадагы коопсуздук жана кызматташтык (ЕККУ) уюмунун туруктуу комитетинин жыйынында Орусия бийлигинин «Эркин Европа/Азаттык үналгысы» (ЭЕ/АҮ) медиакорпорациясына карата репрессиялык чараларды күчөткөнүнө байланышкан маселе көтөрүлдү.

22-апрелде Венада өткөн жыйында АКШнын ЕККУдагы миссиясынын башчысынын милдетин аткарып жаткан Элизабет Розенсток-Силлер сөз сүйлөдү.

«Кошмо Штаттар орус бийлиги сөз эркиндигин чектөөнү улантып жатканы тууралуу айткан Европа биримдигинин жана башка мүчө өлкөлөрдүн тынчсызданууларына ортоктош», — деди Розенсток-Силлер.

Америкалык дипломат акыркы апталарда Орусияда көз карандысыз иликтөөчү журналисттерге карата дагы бир нече тынчты алган учур катталганын белгиледи. Ал «Свобода» радиосунун кабарчысы Антон Сергиенконун коркутуу каттарын алганын мисал кылды. Каттын авторлору аны саткын деп айыптап, артынан аңдып жүрүшкөнүн жазышкан.

Мындан тышкары Элизабет Розенсток-Силлер студенттердин көз карандысыз DOXA журналынын редакциясында да тинтүү жүргүзүлгөнүн эске салды.

«Эркин Европа/Азаттык үналгысы» (ЭЕ/АҮ) медиакорпорациясы жөнүндө айтсам, Орусия «чет өлкөлүк агент» мыйзамы боюнча салып жаткан айып пулдар өтө эле жогору. Туруктуу кеңештин жыйынында орусиялык делегация бул чаралар АКШнын RT телеканалы менен «Спутник» агенттигине карата көрүп жаткан чараларына окшош экени тууралуу жалган маалымат берүүгө аракет кылып келет. Бул жерде эч кандай окшоштук жок. Кремль ЭЕ/АҮ уюмунун теле жана радио берүүлөрүнө тоскоолдук кылып, аны өлкөдөн чыгарууга активдүү аракет кылууда. АКШнын өкмөтү болсо RT менен «Спутниктин» Кошмо Штаттарда иштөөсүнө эч кандай тоскоолдук кылган жок», — деди Розенсток-Силлер.

Ал өткөн жумада ЭЕ/АҮ орус өкмөтүнүн аракеттерине каршы Адам укуктары боюнча Европа сотуна доо арыз жазганын белгилеп, расмий Москваны көз карандысыз журналисттер менен ЖМКларга, анын ичинде ЭЕ/АҮ долбоорлоруна карата репрессияларды токтотууга чакырды.

«Роскомнадзор» мекемеси акыркы айларда «чет элдик агент» мыйзамынын катаал чектөөлөрүн сактаган жок деген доо менен «Эркин Европа/Азаттык» үналгысынын орус тилдүү кызматына 1 миллион долларга жакын айып пул салган. Мекеме бул медиа кызмат 400гө жакын мыйзам бузуу учурларына жол берди деп санайт. Орусия мыйзамдарындагы бардык нормаларды сактап келаткан ЭЕ/АҮ медиакорпорациясы бийликтин бул аракетин редакциялык саясатка кийлигишүү катары баалап, талаптарды аткаруудан баш тарткан.

WWW.