Аймак

КАНАТТАШ ЭКИ КАЛККА САБЫР, ЫНТЫМАК БЕР, ЖАРАТКАНЫМ!

КАНАТТАШ ЭКИ КАЛККА САБЫР, ЫНТЫМАК БЕР, ЖАРАТКАНЫМ!

 1,215 Бардыгы /

Орозодо ойрон заман башталып,

Жаман кабар мээни көзөйт баш жарып.

Базары бир, мазары бир мусулман,

Элдер мылтык атышууда, таш калып.

Оо, Жаратканым, жардам бер. Адамга мындай турсун, курт-кумурскага кесепет-кесирим тийбесин деп, күнөөдөн оолак карманып, ибадат менен Аллага жакындай турган Ыйык Орозо күндөрү дини бир, тагдыры танапташ, мазары менен базары жалпы эки мусулман эл бири-бирине таш ыргытып, ок атып жатат. Бул өтө жаман, кайгылуу окуя болду. Бирок, азыр жалын эмнеден тутанып, кантип ырбаганын айтып, айыптууну издей турган заман эмес. Менден эмес сенден кетти дегенден болгону сөз ырбайт, душмандык сезим курчуйт. Адамдын намысын козгой турган жалындуу сөздөр да майга от чачкандан башка пайдасы аз.

Ошон үчүн:

1. Азыр өзгөчө кырдаал кирген айылдардагы баткендик бир боорлорубузга жабыла ГУМАНИТАРДЫК ЖАРДАМ топтойлу. Канча адамдар үй-жайларын таштап, убактылуу баш калка издеп турушат. Ошолорго тамак-аш менен кошо чатырлар керек болот. Биз, буюрса, бул ишти баштадык.

2. Жаратканга жалбарып, ДУБА КЫЛАЛЫ. Ок атууну баштагандарга ким бир тууганынын канын төксө эки дүйнөсүн ойрон кылып, отко айлантып алары тууралуу туура түшүнүк берсин. Сен бутага алган жоокерби, же катардагы атуулбу, айтор, аны да үйүндө апасы күтүп, баласы сагынып отрурганын сезүү насип этсин.Өзүбүз тараптагы акыбалды билебиз. Тажик тарапта чабышууга чакырган кызуу кандуулар бирин-серин болгону менен, миллиондор согуштан паана тилеп, Алладан аманчылык сурап отурганына шек санабайлы. Согуштан эч ким утпасын, талкаланган тагдырлар менен кан аккан каректердин убалы, уруш-талашка себеп болгондорду соо койбосун ар бир жан аңдашын тилейли.

3. Тажик туугандарга карата ЖАМАН СӨЗ АЙТПАЙЛЫ. Күнөөкөр болуп, чатактын дагы чалкешин чыгаргандан башка андан эч пайда болбойт. Мындай маселе жек көрүү менен чечилбейт.

Оо, Жаратканым, баарыбызга сабыр бер. Акылыбызды тумандатпа. Напсибизге баш ийдирбе. Адам канын төгүүдөн асыра эки тагдырлаш, канатташ калкты. Талаш маселени даанышмандык жана адилеттүүлүк менен чечүүгө мүмкүнчүлүк бер. Жергебизге бейпилдик, тынччылык бер.

Биз, Борбордук Азия өлкөлөрү, келечекте күчтүү конфедерация болушубуз керек. Биздин пикир-ой биригип, бир позициядан сүйлөгөндө гана Чыгышы да, Батышы да биз менен эсептешет. Антпесек, бизди бирден-бирден каалагандай калчап, көөнү келгендей пайдаланышат.

Бизге ынтымак керек.

Нуржигит Кадырбеков – Ыйман Нуру париясынын төрагасы, 29-апрель, 2021-жыл

Автор

Байланыш дареги

Email: aymak.kg@mail.ru

Телефон: +996 (770) 81-00-32

Факс: +996 (3722) 2-32-36

Адрес: Жалал-Абад ш. Ленин к. 17