1,377 Бардыгы /

Баткен облусунун Лейлек районунда абал кайрадан күчөп жатат. Бул тууралуу Лейлек районундагы кырдаал оор болуп турган Интернационал айылынын тургуну Акжол билдирди.

Анын айтымында, Кыргызстандын эки генералы тажик тарапты 2 жолу сүйлөшүүгө чакырса, 2 жолу тең келбей, сүйлөшүүдөн баш тартып коюшкан.

«Аркадагы тажиктердин айткан версиясы боюнча булар:» Тажикстанда жарандык согуш болгон учурда, биздин алсыздыгыбызды пайдаланып, силердин мамлекетиңер Арка менен Максат айылын жөн эле алып койгон»,-дейт. Аскар Акаев чек ара бекемделсин деп үйлөрдү курган эле. Ошону айтып жатышат. Ошондой болгон деп канчалык басып алып, жылган сайын үйлөрдү өрттөп байрактарын сайып кетип жатышат. Азыр ошого басып алган айылдарды бербейбиз деп сүйлөшүүгө келбей жатат экен.»

Акжол ошондой эле Лейлектин чек арасына тажик тарап өздөрүнүн армиясын тартып жакындатып жатканы боюнча маалматтар келип жатканын билдирди.

«Кулундунун асты менен үстүн бириктирчү трасса жол курулган.  Азыр тажик жарандары ошол жакка жакындап, «Кольцо» деген айылды бастырып кирип, жабабыз деп жатышат экен. Ошондо лейлектиктердин бир эле тоолорго качканга гана мүмкүнчүлүгү болот. Күтүүсүздөн башталып кетиши мүмкүн деп отурабыз. Эмне болушун билбей эле кыжалат болуп турабыз. Биздин сөздү жогорку жактагыларга айтсаңар, жардам келсе, армия келсе, дем берсе же бирөөсү чыгып айтса жакшы болот. Жөн эле сүйлөшүп чечебиз деген менен болбой жатат. Кечээ ошентип айтып койгонунан, келген эл кайра Исфанага кетишкен«.

Анын белгилөөсү боюнча Кыргызстандын аскерлери  жокко эсе, жергиликтүү тургундар куралы бары курал көтөрүп, куралы жогу таш көтөрүп турат.

29-апрелде Интернационал айылынын тургундары Исфанага качкан учурда айылдын бир бөлүгү болгон «Жилой домдогу» өрттөлүп жаткан үйлөрдү өчүрүү үчүн төрт адам артка кайтып, тажик жарандары алардын экөөсүн атып ташташкан болчу. Мына ошол 2 жарандын өлүгүн алып чугууга сүйлөшүүгө барган айыл башчысын тажиктер туткундап, өздөрүнүн өлкөсүнө алып кирип кетишкен.

Бүгүн, 1-майда мына ошол эки жарандын сөөгүн тез жардам кызматы келип алып чыгышкан. Алардын сөөгү бүгүн саат 14:00гө жакын жерге берилди.

www/