885 Бардыгы /

Алматыда Шинжаңдагы лагерлерде кармалып турган жакындарын бошотууну талап кылган казактардын мөөнөтсүз акциясы 100 күндөн бери уланууда.

Жакындарынын сүрөттөрүн жана «100 күн» деген жазууларды кармаган бир нече киши бүгүн да Кытайдын консулдугу жайгашкан Байтасов көчөсүнө чыгышты. Полиция алардын дипломатиялык өкүлчүлүктүн алдына барышына уруксат берген жок. Чогулгандар консулдуктан алысыраак жерге топтолуп, «Кытай, бошот!» жана «Эркиндик!» — деп кыйкырышты.

Акция катышуучуларынын алдына акимчиликтин өкүлү чыгып, жыйын мыйзамсыз экенин, бул үчүн административдик жоопкерчилик каралганын эскертти. Жооп катары чогулгандар мыйзам бузушпаганын, болгону Кытайдан жакындары тууралуу маалыматтарды жана алардын бошотулушун талап кылып жатышканын айтышты.

— Мыйзамсыздыкка Кытай барып жатат. Кытай атамды өлтүрүп, апамды жана эки бир тууганымды камакка алды. Алар тууралуу маалымат берип, бошотсун. Бизде бул жерге келип талап кылуудан башка аргабыз жок. 100 күн болду. Эч кандай маалымат берилген жок, — деди Акикат Калиолла аттуу акция катышуучусу.

Калиолла өткөн жумада акциянын башка бир нече катышуучусу менен бирге «Тынч жыйындарды өткөрүүнүн тартиптерин бузуу» беренеси боюнча административдик жоопкерчиликке тартылып, айып пул төлөөгө милдеттендирилген.

Чогулгандар Кытай казактарга карата геноцид кылып жатканын билдирип, Казакстандын бийлигин бул маселеге көңүл бурбай жатат деп айыпташты.

Мөөнөтсүз акция башталган 100 күндөн бери акция катышуучуларына кытай дипломаттарынан эч ким чыккан жок.

Өткөн айда акция катышуучуларынын бири Фарида Кабылбектин Кытайда кармалып турган күйөөсү бошотулган. Апрелде Рахыжан Зейнолла Казакстанга кайтып келип, 17 жылдан кийин үй-бүлөсү менен көрүшкөн.

Кытайдын Шинжаң-Уйгур автоном районунда уйгур, казак жана кыргыздар сыяктуу мусулман жамааттарынын жүз миңдеген өкүлдөрү “саясий тарбия берүүчү лагерлер” деп аталган жайларда негизсиз камалып жатканы 2017-жылдан бери кабарланып келет. Кытай бийлиги мындай дооматтарды четке кагууда.

АКШнын бийлиги, Бельгиянын, Нидерланддын жана Канаданын парламенттери Бээжинде геноцидге айыпташкан. Кытай Шинжаңдагы аракеттерин «өлкөнүн ички иши» жана «терроризмге, экстремизмге каршы көрүлүп жаткан чаралар» деп атап келет.

WWW.