1,611 Бардыгы /

 ОШ. Ош шаарындагы мектептердин мугалимдеринин арасында “Жылдын мыкты мугалими – 2021” кароо-сынагы жыйынтыкталып, жеңүүчүлөр аныкталды. Маанилүү иш-чарага Ош шаарынын мэри Таалайбек Сарыбашов, шаардык Кеңештин депутаттары, билим берүү мекмелеринин жетекчилери, ошондой эле мектептердин мугалимдери дагы катышышты.

Кыргызстандын Түштүк башкалаасынын мэри Таалайбек Сарыбашов салтка айланган мыкты мугалим кароо-сынагы агартуучулардын демине күч-кубат берип, стимул катары гана калыптанбастан, өздөрүнүн кесибин ардактап жана балдарга билим берүүдөгү тажырыйбалары менен бөлүшүүнү дагы камтый тургандыгын жашырган жок.

• Мугалим бул – балдардын сүйүүсүнө ээ болгон инсан. Сиздер

ушундай даражасы бийик инсансыздар! Ошондуктан, Сиздерге канчалык колдоо көрсөтсөк дагы аздык кылат. Быйылкы жылкы уюштурулуп жаткан кароо-сынак чыгармачыл мугалимдердин демине дем, шыгына-шык кошуп алдыга карай чоң шыктанууну жаратуу үчүн уюштурулду десем жанылышпаймын. Себеби, бул жолку сынак өзгөчө багытта уюштурулуп, мугалимдерге чыныгы агартуучулук кесип өтө барктуу экендигине баа берүүчү сынак катары өткөрүлдү. Ош шаарынын мэриясы тарабынан сынакты туура жана калыс өткөрүү үчүн атайын мектепти жакындан билген, мугалимдин иш-аракетин жигердүү талдаган кесипкөй адистерден калыстар тобу куралды. Сынакка катышкан ар бир талапкер өзүнүн аракетин, чыгармачылык дараметин, мыкты чеберчилигин жана өзүнүн кесиптик өнөрканасын дагы көрсөтө алышты деп ойлойм. Ошондуктан, бүгүнкү өткөрүлгөн сынакты дагы өз демилгебиз менен уюштуруп, жеңүүчүлөрдү татыктуу белек-бечкектер  менен сыйлоону чечтик. Бүгүнкү Сиздерге ыроолонгон батир, автоунаа жана башка дагы бир катар баалуу белек-бечкектер демөөрчүлөр жана шаардык мэрия тарабынан берилди. Андыктан, баардык колдоо көрсөткөн демөөрчүүлөргө чын дилден ыраазычылык гана билдиремин! – деди Ош шаарынын мэри Таалайбек Сарыбашов.

Аталган жарышшка жалпысынан 42 мугалим катышып, финалдык баскычка булардын жетөө гана жетти. Ош шаарынын мэри демөөрчүлөр менен биргеликте жеңүүчү мугалимдерге төмөнкү белектерди тапшырды.

Сынактын баш байгесин утуп алган №52-Кыргыз-Түрк достугу мектебинин мугалими Ильгиз Шамырзаевге батир тапшырылды. Батирге “Эмаком” курулуш компаниясынын демөөрчүлүк кылды. Биринчи орунду М. Ломоносов атындагы гимназия мектебинин Кыргыз-тил мугалими Капар Момуналиев ээлеп, автоунаа минди. Бул автоунаа “Визион” курулуш компаниясы тартуулады. Экинчи орунду алган №5-мектебинин биология мугалими Айдана Кадыровага Ош шаарынын мэриясынын атынан муздаткыч, компьютер, түстүү принтер жана кир жуучу машина тапшырылды. Үчүнчү орунга татыган №38-мектебинин башталгыч класстар мугалими Мөөргүл Мамытова Ош шаарынын мэриясы тарабынан компьютер, түстүү принтер жана “робот чаң соргуч” тапшырылды. Мындан тышкары, “Карс” такси кызматы тарабынан үч мугалимге Ысык-Көлгө эс алуу үчүн жолдомо тапшырылып, сынакка катышкан мугалимдер үчүн ноутбук, чаң соргучтар жана сматфондор дагы таратылды.

Алишер ТОКСОНБАЕВ, өз кабарчыбыз