1,014 Бардыгы /

Тажикстандын чыгышындагы Сангвор районунда жашаган видеоблогер Лайрон Файзали Сафаров YouTube порталындагы каналы жабылганын билдирди.

Аймактын жаратылышы тууралуу видеолору менен атактуулукка жеткен 39 жаштагы блогер Alivvza аттуу каналын 2016-жылы ачып, бүгүнкү күнгө чейин 144 миңден ашык катталуучу топтогон. Анын каналга жайгаштырган видеолорун 10 миңден 1 миллионго чейин колдонуучу көрүп келген.

«Бул токтошу керек! Менин видеолорум боюнча ар кайсы жерден телефон чалып, сөгүп жатышат. Ошондуктан мунун баарын таштап, жашоодон ыракат алууну чечтим», — деди блогер «коштошуу видеосунда».

Ал журналисттерге YouTube каналынын жабылышынын себеби тууралуу айтуудан баш тартып, болгону чарчаганын, эс алгысы келгенин билдирди.

Бирок Шодимухаммад Кодиров аттуу жергиликтүү тургун акыркы кездери блогерге бийлик тараптан кысым болуп келгенин билдирүүдө. «Мен бул абалды жакшы билген адамдар менен сүйлөштүм. Алар бийлик Файзалиден өлкө башчынын саясатын мактап, бийликти сындагандарга каршы болууну талап кылганын айтышты. Блогер аны саясатка аралаштырбоону өтүнгөн. Бирок район бийлиги ага «биз айтканды кыласың же таптакыр иштебейсиң» деген ультиматум коюшкан», — деди Кодиров.

Райондук ички иштер бөлүмүндөгү аты-жөнүн билдиргиси келбеген булак видеоблогерге кысым болгонун ырастады. Анын айтымында, Файзали Сафаров жер тилкелеринин жетишсиздигинен улам нааразылык билдирген айыл тургундарын айыптап чыгышы керек болчу.

«Блогерди видео тартып, тургундардын жер тилкесине байланышкан көйгөйлөрү жок экенин көрсөтүүгө милдеттендиришкен. Менин билишимче, ал Улуттук коопсуздук комитетинин аймактагы бөлүмүнө да чакырылган», — деди булак.

Сангвор райондук акимчилигинен видеоблогерге кысым болгонун четке кагышты. «Мен анын эмгектерин көргөм, өтө жакшы видеолор. Биз блогерлерге саякат тууралуу сайтыбыз менен кызматташууну да сунуштаганбыз. Бизде блогерлер менен эч кандай маселе жок», — деди акимчиликтин социалдык өнүктүрүү бөлүмүнүн башчысы Шоди Рахмонов.

Файзали Сафаров 2017-жылы Тажикстанда «YouTube баатыры» деген наам алган. 2019-жылы «Озоди» радиосунун «Менин айылым — мекенимдин бир бөлүгү» деген видеосынагына катышып, баш байгени жеңип алган.

Жергиликтүү жана эл аралык укук коргоо уюмдары акыркы жылдары Тажикстанда бийликтин ЖМКларга карата кысымы күчөгөнүн айтып келишет. «Чек арасыз кабарчылар» эл аралык уюмунун 2020-жылга карата жарыяланган сөз эркиндиги боюнча рейтингинде Тажикстан 180 өлкөнүн ичинен 161-орунга жайгашкан.

WWW.