771 Бардыгы /

ОШТО ДАГЫ ОРХАН ИНАНДЫНЫ ИЗДӨӨ ИШТЕРИ ЖҮРҮП ЖАТАТ

          ОШ. «Сапат» («Себат») Эл аралык билим берүү мекемесинин жетекчиси Орхан Инандыны издөө иштери Ош облусунун аймагында дагы абдан кызуу жүрүп жатат. Бул жөнүндө Ош облустук ички иштер башкармалыгынан билдиришти.

Издөө иштеринин алкагында ШИИБ, РИИБ жана аймактык милиция бөлүмдөрүнүн имараттарындагы «Милиция издөө салат» тактайчаларына Орхан Инандынын өзгөчө белгилери илинген.

Калк арасында, жергиликтүү мекеме-ишканалардын кызматкерлерине түшүндүрүү иш-чаралары жүргүзүлүп жатат. Башка издөөдө жүргөн жарандар боюнча дагы үй-бүлөлөрүнөн, жакындарынан кабар алуу менен алардын жүргөн жерин аныктоо боюнча ыкчам иш-чаралары кызыды. Мындан тышкары чек арага чектеш аймактарда, чек ара өткөрүү бекеттеринде издөөдөгү жарандар боюнча маалыматтар илинип, чек арадан кирип-чыккан атуулдар катуу көзөмөлгө алынууда. Ушул мезгилге чейин дээрлик 1653 коомдук жайлар текшерилди, – дейт Ош облустук ички иштер башкармалыгынын басма сөз кызматынын жетекчиси Жеңиш Ашырбаев.

Айтмакчы, Бишкек шаарында жашаган «Сапат» («Себат») эл аралык билим берүү мекемесинин жетекчиси Орхан Инанды ушул жылдын 1-июнуна караган түнү дайынсыз жоголгон. Анын «Лексус GX470» унаасы Бишкек шаарындагы Малдыбаев көчөсүндөгү №10 жана №11 көп кабаттуу үйлөрдүн ортосундагы короодон табылган. Октябрь РИИБдин басма сөз кызматы билдиргендей, 1-июнга караган түнү саат 04:20да милицияга 12-кичи райондогу көп кабаттуу үйдүн короосунда эшиги ачык турган «Лексус 470» унаасы тууралуу маалымат келип түшкөн. Ал жерге Октябрь РИИБдин №3 шаардык милиция бөлүмчөсүнүн ыкчам тергөө тобу барган. Аларга Ю.К. аттуу жаран арыз менен кайрылып, атасы Орхан Инандыны таап берүүнү суранган. Ю.К.нын айтымында, атасы «Лексус 470» унаасын айдачу. Акыркы жолу 31-майда саат 18:00 чамасында байланышка чыккан.

Алишер ТОКСОНБАЕВ, өз кабарчы