1,101 Бардыгы /

Өзбекстандын мамлекеттик ковид-борборлорундагы бир күндүк дарылануунун баасы 400 миң сум (40 долларга жакын) болсо, жеке ооруканалардагы дарылануунун баасы 2,7 миллион сумга чейин ($250) жетүүдө. Бул тууралуу жакындары коронавирустан дарыланып чыккан тургундар билдиришүүдө.

“Былтыр күзүндө атам коронавирус жуктуруп алып, катуу ооруган. Аны жеке ооруканага алып барып, реанимация бөлүмүнө жаткырууга туура келген. Бул үчүн суткасына 500 доллардан төлөдүк. Мындан тышкары кыйла кымбат баадагы дарылар үчүн дагы бир нече миң доллар короттук. Атам 20 күн жатты. Биз карызга баттык. Мени баалардын эмнеге мынча кымбат болуп жатканы кызыктырууда”, – деди Ташкенттин тургуну.

2021-жылдын биринчи жарым жылдыгында Өзбекстанда орточо айлык акы 2,971 миллион сумга ($280) барабар болгон.

Бул маалыматты өлкөдөгү бир нече жеке оорукананын кызматкерлери да ырасташты.

“Палатада бир сутка дарылануу үчүн 1,5 миллион сум ($140), реанимацияда жатууга – 2 миллиондон 4 миллион сумга чейин ($190-$375) төлөөгө туура келет”, — деди Юнусабад медициналык борборунун кызматкери.

Анын айтымында, 1,5 миллион сум төлөгөн бейтапка төрт маал тамак берилип, ал дарылануу үчүн зарыл болгон дары-дармек менен 90-95% камсыз болот.

AKFA Medline аттуу жеке оорукананын кызматкери клиниканын күндүзгү бөлүмүндө дарылануу үчүн бейтап 1 миллион 700 миң сумдан 2 миллион 700 миң сумга чейин ($160-$250) төлөшү керектигин билдирди. Анын айтымында, баадагы айырмачылык бейтапка берилген дарылардын санына жана сапатына жараша болот.

Өзбекстандагы эң ири жеке ооруканалардын бири эсептелген “Акфа Медлайн” Ташкенттин башчысы Жахонгир Артыкхожаевдин үй-бүлөсүнө таандык.

Былтыр март айында өлкө президенти Шавкат Мирзиёев жеке ооруканаларга коронавирус жуктуруп алган бейтаптарды дарылоого уруксат берген жарлыкка кол койгон.

Өткөн жылы августта Ташкенттеги 14 жеке оорукана коронавирус менен ооругандарды кабыл алып жаткан. Бүгүнкү күндө өлкө боюнча канча оорукана COVID-19га кабылган бейтаптарды дарылап жатканы белгисиз.

Саламаттык сактоо министрлигинин маалыматына ылайык, акыркы бир сутканын ичинде Өзбекстанда 856 кишиге коронавирус жугуп, вируска кабылгандардын жалпы саны 137 491ге жетти.

WWW.