870 Бардыгы /

Германияда шайлоонун жыйынтыктары чыккандан кийин алдыңкы партиялардын лидерлери жаңы өкмөт түзүү боюнча болжолдуу сүйлөшүүлөрдү баштады.

Канцлердик кызматка талапкер болуп жаткан Социал-демократтар партиясынын (SPD) лидери Олаф Шольц да, Христиан-демократиялык бирикмеси жана Бавариянын христиан-социалдык бирикмесинен турган саясий блогдун (CDU/CSU) өкүлү Армин Лашет да жаңы өкмөттү “Жашылдар” жана Эркин демократиялык партиянын катышуусунда түзүү ниетин билдирип жатышат. Шольцтун оппозицияга кетүү чакырыгына карабастан, Христиан-демократиялык бирикмесинин лидери Армин Лашет канцлер кызматы үчүн күрөштөн чыгуудан баш тартууда.

Азырынча “Жашылдар” менен Эркин демократиялык партия булардын кимиси менен коалиция түзүүгө даяр экендиги боюнча акыркы чечим кабыл ала элек. Жаңы өкмөт түзүү боюнча сүйлөшүүлөр бери дегенде эле жылдын аягына чейин созулат деп күтүлүүдө. Ага чейин Ангела Меркел башында турган министрлер кабинети бийликте калат.

AFP агенттиги белгилегендей, партиялар ортосунда программалык карама-каршылыктар көп, мындан улам жаңы өкмөт түзүү үчүн алардын бир пикирге келүүсү жеңил болбойт. “Жашылдар” жана Эркин демократиялык партия салык, социалдык программа, климаттагы өзгөрүүлөр саясатында эки башка пикирди карманышат.

Жекшемби күнкү шайлоого катышкан дагы эки партиянын жаңы өкмөткө кирүү ыктымалдыгы жокко эсе. Ашынган оңчулдардын “Германия үчүн алтернатива” (AfD) партиясы парламентке өткөнү менен алдынкы партиялар алар менен коалицияга баруу мүмкүнчүлүгүн четке кагышты.

26-сентябрдагы шайлоонун жыйынтыгында вице-канцлер Олаф Шольц жетектеген социал-демократтар добуштардын 25,7%, Меркелдин Христиан-демократиялык бирикмеден жана Бавариянын христиан-социалдык бирикмесинен турган саясий блогу 24,1%, “Жашылдар” партиясы 14,8%, Эркин демократиялык партия 11,5%, “Германия үчүн альтернатива” 10,3% жана Солчулдар (Die Linke) 4,9% ээ болушкан.

WWW.