2,202 Бардыгы /

БИШКЕК. Кыргыз Республикасында Ош шаарындагы Кыргыз-Түрк достугу мектеп-лицейинин кыргыз тили жана адабияты мугалими Ильгиз Шамырзаев 2021-жылдын мыкты мугалими деп табылды. Ал эми Кыргызстандын түштүк башкалаасындагы 61-“Ак Каркыра” балдар бакчасынын тарбиячысы Маргарита Нагаева дагы өлкөбүздөгү эң мыкты тарбиячы деп таанылды.

Ошентип, башкалаабыз Бишкек шаарында “Жылдын мыкты тарбиячысы” жана “Жылдын мыкты мугалими” республикалык сынагы акыры жыйынтыкталды. Билим берүү жана илим министрлигинин басма сөз кызматынан билдиришкендей, республикабыздын булуң-бурчунан келишкен байге ээлерине жана жеңүүчүлөргө медаль жана дипломдон тышкары компьютер, же тиричилик техникасын сатып алуу үчүн 100 миң сомдук сертификаттар, ошондой эле көгүлтүр Ысык-Көлдөгү пансионатка жолдомо дагы тапшырылды.

Айтмакчы, мугалимдер арасында  экинчи орунду Баткен облусунун Лейлек районунун 5-мектеп-гимназиясынын математика мугалими Сагыналы кызы Бактыгүл ээледи. Үчүнчү орунга Бишкек шаарындагы 57-орто мектептин башталгыч классынын мугалими Гүлзат Жапарова татыды. Ал эми бала бакчанын тарбиячыларынын номинациясында экинчи орунга Нарын шаарындагы 16-“Ыйман” бала бакчасынын тарбиячысы Сюита Басылбекова арзыды. Буга улай үчүнчү орун Ысык-Көл облусунун Жети-Өгүз районундагы Наристе бала бакчасынан тарбиячысы Любовь Саратовага ыйгарылды. Экинчи орун үчүн 80 миң сом, үчүнчүсүнө 60 миң сом, ошондой эле компьютер, же башка тиричилик техникасын сатып алуу жана көгүлтүр Ысык-Көлгө саякат үчүн сертификаттар тапшырылды.

Айтмакчы, Кыргызстанда узаган жылдын мыкты мугалими жана тарбиячысы сынактарын жыл сайын өткөрүү кадимки салтка айланган.

Алишер ТОКСОНБАЕВ, өз кабарчы