2,361 Бардыгы /

ОШ. Ош облусуна караштуу Ноокат шаарынын мэри менен мурдагы спикери кызмат абалынан кыянаттык менен пайдаланууга күмөндөлүп кармалышты.

УКМК тараткан маалыматка караганда, кармалгандар 2017-жылдан тартып 2021-жылга чейин казынага 15 миллион сом зыян келтиришкен. Ошондуктан, ушул жылдын 13-октябрында Жазык-процесстик кодексинин 98-беренесине ылайык Ноокат шаарынын мэри Н.Ж.А. жана мурдагы спикер, азырку учурда Ноокат шаардык Кеңешинин депутаты Г.А.М. кармалышып, убактылуу кармоочу жайга киргизилди. Ушул тапта УКМК сотко чейинки өндүрүштүн алкагында күнөөлүүлөрдү жоопко тартуу жана бюджетке келтирилген зыяндын ордун толтуруу боюнча тергөө иштерин жүргүзүүдө.

Буга чейин УКМК Нарын шаарынын мэри Самарбек Болотбековду дагы алдамчылыкка шектеп кармаган. С. Болотбеков “Жогорку Кеңештин мурдагы депутаты Руслан Чойбеков 2020-жылдагы парламенттик шайлоодо 300 миң доллар алган” деп тергелип жаткан иштин алкагында шектүү катары камакка алынды. Кийин ал Башкы прокуратуранын прокурорунун өтүнүчү менен тышка чыкпоо жөнүндөгү тилкаттын негизинде бошотулган. Андан ары ал кызматынан кете тургандарын жарыялаган.

Алишер ТОКСОНБАЕВ, өз кабарчы