891 Бардыгы /

БАТКЕН. Бүгүн Баткен шаарында “Баткенди өнүктүрүү – өлкөнү өнүктүрүү” форуму жүрүп жатат. Маанилүү иш-чарага Министрлер кабинетинин төрагасы, президенттик администрациянын жетекчиси Акылбек Жапаров, мамлекеттик органдардын жетекчилери, эл аралык уюмдардын, дипломатиялык корпустардын, каржылык институттардын, бизнес-омбудсмен өкүлдөрү, ошондой эле атамекендик ишкерлер катышууда.

Кыргыз Өкмөтүнүн башчысы жыл сайын Баткен облусун өнүктүрүү фондуна казынадан 500 миллион сомдон бөлүнүп тураарын абдан катуу убадалады. Ажыратылган акчалар ай сайын берилбей жыл башында эсепке түшүп, экономикалык долбоорлорду жүзөгө ашыруу үчүн гана жумшалат.

• Форумдун жыйынтыктары боюнча Өкмөттүн отурумун жаңы жылга

чейин дагы Баткенде өткөрөбүз. Форумда кабыл алынган чечимдин баары кандай аткарылып жатат, кол коюлган бизнес долбоорлор илгери жылдыбы, аларга бизден кандай жардам керек экенин кеңири талкуулайбыз. Электр энергия, суу, канализация деген маселелерди чечип берет деген милдеттенмени Өкмөт моюнга алып жатат. Капиталга болгон жеткиликтүүлүктү биз өлкөбүздө Баткен облусунан баштайбыз. Ишкерлерге каражат таап беребиз, бирок, долбоорлордун бардыгы сапаттуу болуш кажет!  – деди Кыргыз Өкмөтүнүн башчысы Акылбек Жапаров.

Буга улай Акылбек Жапаров Дүйнөлүк Банк менен алдын ала макулдашуулар жүрүп, 60 миллион АКШ доллары Баткен облусунда айыл чарба тармагын өнүктүрүүгө жумшалаарын дагы кошумчалады.

– “Баткенди өнүктүрүү – өлкөнү өнүктүрүү” Форуму аймактын экономикалык дараметин кеңейтүү жана инвестициялык мүмкүнчүлүктөрүн көрсөтүү, жергиликтүү тургундардын жашоо сапатын жогорулатуу максатында гана уюштурулган. Быйыл апрелдин соңундагы Кыргыз-Тажик чек арасында болгон куралдуу кагылышта күйүп кеткен жана талкаланган Баткен районундагы үйлөр толук курулуп бүтө элек, – деп кашкайган чындыкты моюндады Министрлер кабинетинин төрагасы, президенттин администрациясынын жетекчиси Акылбек Жапаров.

Айтмакчы, үстүбүздөгү жылдын 28-30-апрелинде жана 1-майында Кыргыз-Тажик чек арасындагы куралдуу кагылышта 140 турак жай, беш мектеп, эки фельдшердик-акушердик бекет, үч бала бакча, эки милиция бекети, 24 май куйган бекет, 60 коммерциялык объект, эки чек ара бекети жана бир клуб толугу менен талкаланган. Ал эми Тажикстандын Согдий облусунда 14 турак жай бузулуп, эки үй, бир курулуш жарым-жартылай жабыркаганы маалымдалган. Куралдуу жаңжалда Кыргызстандан 36, Тажикстандан 19 адам набыт тапкан. Эки өлкө бул үчүн бири-бири айыптап, а түгүл кылмыш иштерин дагы козгошкон.

Алишер ТОКСОНБАЕВ, өз кабарчы