1,119 Бардыгы /

БАТКЕН.   Баткен шаарындагы Кыргыз Республикасынын  УКМКсына караштуу Чек ара кызматынын Баткен облусу боюнча башкармалыгынын базасында башкаруу органдарынын башчылары, УКМКнын Чек ара кызматынын облустар боюнча башкармалыктарынын жетекчилери, Чек ара отряддарынын башчылары жана алардын орун басарлары менен ыкчам жыйын өткөрүлдү.

Маалыматка караганда, бул ыкчам жыйындын негизги максаты – мамлекеттик чек араны кайтарууну уюштурууда Кыргыз Республикасынын  УКМКсына караштуу Чек ара кызматынын Чек ара органдарын жана аскерлерин башкаруу боюнча офицерлердин кесипкөйлүк сапатын жакшыртуу эле. Аталган иш-чаранын башка жыйындардан өзгөчөлүгү – Чек ара коопсуздугун камсыздоого иш жүзүндө көп көңүл бурулду. Жыйындын жүрүшүндө башкаруу органдарынын жетекчилери облустук башкармалык башчылары, чек ара отряддарынын башчылары жана алардын орун басарлары менен биргеликте коюлган тапшырмаларды аткарууда жалпы ыкмаларды иштеп чыгышты. Ошону менен бирге Борбор Азия чөлкөмүндөгү, ошондой эле Ооганстандагы азыркы аскердик-саясий кырдаал, коркунучтардын жана чакырыктардын өзгөрүлгөн түрлөрү дагы бекем эске алынды.

Аталган чоң жыйындын катышуучулары 2021-жылдагы Борбор Азия чөлкөмүндөгү ыкчам кырдаалды жана анын 2022-жылга карата өнүгүү тенденцияларын дагы орой-чарай талкуулашты. Мындан тышкары офицерлер мыйзамдардагы жаңылануулар, коррупциянын алдын алуу жана аскер кызматкерлердин мыйзамсыз иш-аракеттерге аралашуусу боюнча маселелерди дагы бетме-бет талкуулашты.

Ошентип, укчам жыйындын катышуучуларына инженердик камсыздоо боюнча көрсөтмө сабактар дагы өткөрүлүп, ошону менен бирге оор жана жеңил брондолгон техникаларды башкаруу боюнча өзүнчө көрсөтмө сабактар уюштурулду. Офицерлер ок атуу жана топтук куралдардын бардык түрлөрүн колдоно билүү боюнча өздөрүнүн жөндөмдүүлүгүн дагы көрсөтүштү. Ыкчам жыйындын жүрүшүндө жетектөөчү курам жана чек ара отряддарынын колбашчылыгы даярдыктын ар кандай түрлөрү боюнча көзөмөл сынактарын дагы тапшырышты.

Алишер ТОКСОНБАЕВ, өз кабарчы