1,029 Бардыгы /

          БИШКЕК. Белгилүү ишкер Эркин Салымбеков жергиликтүү дыйкандар үчүн атайын тоскоолдуктарды жаратып,  а түгүл алардан ири суммада акча дагы алып тургандыгы айтылды.

Баса, узаган аптада Эркин Салымбеков атайын кызматтык өкүлдөрү тарабынан кармалып, бир айга камакка алынган. Ал эми бул жумада аны кармоонун себеби айыл чарба азыктарын экспорттоодо өндүрүүчүлөргө атайын тоскоолдуктарды жараткандыгы үчүн шектелип жаткандыгы ачыкталды. Бул туурасында УКМКнын маалымат кызматынан  билдиришти. Эркин Салымбеков айыл чарба азыктарын ЕАЭБ өлкөлөрүнө экспорттоодо атайын тоскоолдуктарды жараткан деп күмөндөлүп жатат. Мындан тышкары бул ишке Айыл, суу чарба жана аймактарды өнүктүрүү министрлигинин айрым кызматкерлеринин дагы катыштыгы бардыгы жар салынды. Мунун кесепетинен айыл чарба өндүрүүчүлөрү ЕАЭБ өлкөлөрүнө продукцияларды эспорттоо үчүн кызмат адамдарына жана логистикалык компанияларга ири суммадагы акча төлөөгө мажбур болушкан.

Ошентип, атайын иликтөөнүн жыйынтыгында Айыл, суу чарба жана аймактарды өнүктүрүү министрлигинин айрым кызматкерлери, бул коррупциялык схеманы уюштурган логистикалык компаниянын өкүлдөрү жана «Дордой Дыйкан» базарынын директору Эркин Салымбеков кармалып, абакка киргизилди. Ушул тапта бул жосунсуз жорукка тиешеси бар башка адамдарды аныктоо иштери дагыле улантылууда.

Алишер ТОКСОНБАЕВ, өз кабарчы