843 Бардыгы /

 БАТКЕН. Кыргыз өкмөтү Баткенде ишкерлик кылгандарга бир катар жеңилдиктерди катуу убада кылды. Салыктардан тышкары экономикалык мыкты долбоорлорго салынган инвестиция үчүн дагы мамлекеттик кепилдик берилээри айтылды.

Ошентип, Кыргыз Өкмөтү ишкерлерге түзүлүп жаткан заманбап бир катар шарттар жана жеңилдиктер чек ара айылдарындагы жумушсуздукту кыскартып, тышкы миграциянын агымын басаңдатат деп үмүт артууда.

• Ишкерликти баштап жаткандар үчүн жергиликтүү бийлик

жана Кыргыз өкмөтү тарабынан тоскоолдуктар толугу менен жоюлуп, эл аралык талаптарга дал келе турган долбоорлорду даярдоого каржылык колдоо көрсөтүлөт. Ад эми жеке инвестицияга мамлекеттик кепилдик үчүн дагы каражат ажыратып жатабыз, – деди Баткенде өткөн инвестициялык форумга катышкан Министрлер кабинетинин төрагасы, президенттин администрациясынын жетекчиси Акылбек Жапаров. – Өзгөчө инвестициялык режим киргиздик. Министрлер кабинети Баткендин инвестицияларына Мамлекеттик кепилдик берүүгө даяр. Технологиялары “Евростандарт-5” талаптарына толук жооп берсе, Кытай базарына дагы эч кандай тоскоолдуксуз чыга ала тургандай болот. Буюрса, жаңы жылга дейре каржы министрлиги он чакты долбоорго кепилдик берет.

Мындан атышкары Баткен облусунун чек ара аймагында ишкердик жасоо үчүн катталгандардан салыктын төрт түрү дагы алынбайт. Тактап айтканда, жер, мүлк, пайда жана сатуудан түшкөн салыктан бошотулат. Ошондой эле, беш жылга чейин киреше салыгы беш пайыз чекке төмөндөтүлөт. Эгерде ошол эле кыскартылган пайыздык салык дагы кайра эле Баткен аймагында ишти жандандырууга салынса, жеңилдетилген шарт он жылга чейин дагы узартылат.

Кыскасы, саналган жеңилдиктер менен Кыргыз Өкмөтү ишкерлерди жана инвесторлорду Баткенге тартууга алгачкы кадам таштап жаткандыгын көрсөтүп, ишкердик үчүн жагымдуу мүмкүнчүлүктү пайдаланып калууга чакырууда.

Алишер ТОКСОНБАЕВ, өз кабарчы