825 Бардыгы /

Кыйноолорду жана башка катаал, адамгерчиликсиз же кадыр-баркты басмырлаган мамиленин жана жазанын түрлөрүн алдын алуу боюнча Кыргыз Республикасынын Улуттук борборунун (КР КАУБ) Талас облусундагы аймактык өкүлчүлүгүнүн кызматкерлери Таластагы убактылуу кармоочу жайды алдын ала текшерүүчү сапарынын жүрүшүндө кармалгандарды кармоо шарттарында көптөгөн бузууларын бар экендигин аныкташты.

Камактагылар нымдуулукка, кир төшөнчүлөргө, керебеттердин жана жууркан-төшөктүн жоктугуна даттанышкан. Текшерүугө барган кезде убактылуу кармоочу жайда кармалгандар жана иштегендер үчүн жуунучу бөлмө иштен чыгып турган. Душ бөлмөлөрү начар абалда: кафелдер сынып, крандары жулунган. Колго жасалган суу жылыткычтар техникалык талаптарга жана стандарттарга жооп бербейт, аны колдонууда адамдардын өмүрүнө жана ден соолугуна коркунуч жаралышы мүмкүн. Санитардык бөлмөлөр антисанитардык абалда.

КР КАУБнын аймактык өкүлчүлүгүнүн билдирүүсүнө караганда, бул фактылар “Кылмыш жасоого шектелип жана айыпталып кармалган адамдарды кармоо тартиби жана шарттары жөнүндө” 2007-жылдын 25-июнундагы  №91 КР Мыйзамынын бузуулушу болуп саналат. Ушул мыйзамдын “Материалдык жана тиричилик жактан камсыздоо” боюнча 22 берененин 2-п. ылайык, шектелгендер менен айыпталуучуларга жекече уктоочу жай, төшөнчү жана шейшептер берилиши керектиги айтылган. Ошондой эле Кыргыз Республикасынын ички иштер органдарынын убактылуу кармоочу жайларынын ички тартибинин эрежелери бузулган (КР Өкмөтүнүн 2013-жылдын 21-январындагы №23, 2014-жылдын 8-октябрындагы №585 токтомунун редакциясы).

“Бардык мыйзам бузуулар системалуу жана алар кыйноо жана адамдык кадыр-баркты басмырлоочу мамиле катары кабыл алынуу тийиш”, – деп белгиледи, КР КАУБнын аймактык өкүлчүлүгүнүн башчысы Нурлан Абдыраимов.

Анын айтымында, ушул жылдын 14-апрелинде жабык мекемеде аталган көйгөйлөр боюнча буга чейин облустук прокуратурага кайрылуу жөнөтүлгөн. Көзөмөлдөөчү орган убактылуу кармоочу жайдагы мыйзам бузууларды четтетүү боюнча тапшырма берген, бирок баары өзгөрүүсүз калган.

Акыркы иш сапардын жыйынтыгына ылайык, мыйзам бузуулар боюнча акт түзүлүп, ал дагы Талас облусунун прокуратурасына жөнөтүлдү.