1,224 Бардыгы /

Өзбекстандын айрым облустарында мектеп мугалимдери бүтүрүүчүлөрдүн ишке орношкону тууралуу документтерди топтоого милдеттендирилди.

Самарканд облусунун Ургут районундагы мугалимдер “Озодлик” радиосуна кайрылып, мындан тышкары алар бүтүрүүчүлөрдүн ата-энелеринен балдарын жумушка орноштуруу милдеттенмесин алган тилкатка кол койдуруп алууга мажбурланып жатышканына даттанышты.

– Аким менен райондук билим берүү башкармалыгынын жетекчилери мугалимдерге тынчтык бербей жатышат. Бизге мектепти быйыл аяктаган бүтүрүүчүлөрдү ишке орноштуруу тапшырмасы берилди. Мугалимдер бүтүрүүчүлөрдү иш менен камсыз кылууга милдеттүү эмес да, – деди аты-жөнүн билдиргиси келбеген мугалимдердин бири.

Буга чейин ушундай эле арыз менен Фергана облусунун Ташлак районундагы мугалимдер да “Озодлик” радиосуна кайрылышкан.

Бирок Фергана облустук билим берүү башкармалыгы мугалимдерге мектеп бүтүрүүчүлөрүн ишке орноштуруу талабы коюлуп жатканы тууралуу билдирүүлөрдү четке какты.

– Мугалимдерден мектеп бүтүрүүчүлөрү эмне менен алектенип жүргөнү тууралуу маалымат топтоону гана өтүнүшкөн. Анткени алар ар бир бүтүрүүчүнү, анын үй-бүлөсүн жакшы билишет. Бирок мугалимдерди бул ишти кылууга мажбурлаган жокпуз. Бүтүрүүчүлөрдү жумушка орноштуруу менен мугалимдер эмес, Ишке орноштуруу министрлиги алектенет, – деди башкармалыктын өкүлү.

Бул Өзбекстанда мугалимдерден мектеп бүтүүрүүчүлөрүн ишке орноштуруу талап кылынган алгачкы учур эмес.

Былтыр өлкөнүн премьер-министри Абдулла Арипов билим берүү тармагындагы кызматкерлер акимдердин жардамчыларына айланып калганын айтып, мугалимдерди мажбурлап иштеткен учурлар катталса жергиликтүү бийлик өкүлдөрү иштен алынарын эскерткен.

Билим берүү министрлигинин маалыматына ылайык, Өзбекстанда 2020-2021-окуу жылы 437 761 бала жалпы билим берүү мектептерин аяктаган. Алардын 90 миңи жогорку окуу жайларга тапшырса, 80 миңи профессионалдык колледждерди билим алып жатышат.

Мамлекеттик статистика комитетинин маалыматына караганда, Өзбекстанда жылдын биринчи жарымында жумушсуздук орточо тогуз пайызды түзгөн.

Өлкөдө 30 жашка чейинки жашоочулардын саны 18 миллиондон ашат, бул жалпы калктын дээрлик 55% түзөт.

Былтыр президент Шавкат Мирзиёев 30 жашка чейинки тургундардын арасындагы жумушсуздук 17% түзөрүн, бул жалпы өлкө боюнча жумушсуздук деңгээлинен 1,5 эсеге көп экенин билдирген.

WWW.