936 Бардыгы /

БИШКЕК. Америка Кошмо Штаттары Кыргыз Республикасына COVID-19-га каршы Pfizer вакцинасынын 259,740 дозасын тапшырды. Вакцианалар дүйнөдө COVID-19 вакциналардын жетиштүүлүгүн камсыз кылуу боюнча COVAX демилгеси аркылуу жеткизилди. АКШ бул вакциналарды Кыргыз Республикасында COVID-19 менен күрөшкө көмөк көрсөтүү катары гана берип жатат.

• Биз COVID-19га каршы чабуулду бирге улантышыбыз керек! – деп

АКШнын Убактылуу ишенимдүү өкүлү Соната Коултер деп расмий жыйында билдирди. – Ар бир каалоочу коопсуз жана натыйжалуу вакцина ала алышы абзел! Ошондуктан, АКШ бул вакциналарды тапшырып, Кыргыз Республикасынын Өкмөтүнүн COVID-19-га каршы эмдөө аракеттерине каржылык колдоо көрсөтүп келатат.

Баса, вакцинаны тапшыруу аземине министрлер кабинетинин төрагасы Акылбек Жапаров, Саламаттыкты сактоо министри Алымкадыр Бешеналиев, Жапония, Швейцария, Улуу Британия жана Европа Биримдиги сыяктуу COVAX демилгесинин активисттери катышышты. Pfizer вакцинасын сактоо үчүн зарыл болгон атайын өтө төмөн температурадагы тоңдургучтарды жана тиешелүү шприцтерди жеткирүү үчүн COVAX демилгесинин эл аралык колдоосу абдан маанилүү болгон.

• Биз COVID-19га каршы күрөшүү программасынын алкагында

берилген вакцина үчүн терең ыраазычылыгыбызды билдиребиз. Кыргызстан эл аралык коомчулуктун кызматташтыгын жана жардамын абдан жогору баалайт! – деди Кыргыз Республикасынын министрлер кабинетинин төрагасы Акылбек Жапаров.

Ошентип, пандемия башталгандан бери АКШ Кыргыз Республикасында COVID-19 менен күрөшүү үчүн 9 миллион доллардан ашык каражат ажыратты. А USAID жана АКШнын Ооруларды көзөмөлдөө жана алдын алуу борборлору (CDC) аркылуу берилген каражат COVID-19-ду алдын алуу, аныктоо жана дарылоо үчүн медициналык жабдууларды алуу жана техникалык жардам көрсөтүүгө багытталган. Мындан тышкары бул көмөктөшүү жеке коргонуу каражаттарын дагы сатып алууга, лабораторияларды модернизациялоого, медициналык жана башка адистерди окутууга, ошондой эле Кыргыз Республикасындагы эмдөө иштерине дагы багытталды. АКШ COVID-19 пандемиясын токтотуу, анын терс социалдык жана экономикалык кесепеттерин жумшартуу жана келечектеги эпидемияларга туруштук берүүгө даярдыгын жогорулатуу үчүн Кыргыз Республикасы менен өнөктөштүктү мындан ары дагы улантмакчы.

Алишер ТОКСОНБАЕВ, өз кабарчы