951 Бардыгы /

11-декабрга караган түнү Чымкент шаардык ички иштер башкармалыгы тергөө учурунда табышмактуу каза болгон 30 жаштагы Нурболат Жумабаевдин өлүмүнө шектүү катары үч полиция кызматкерин кармады. Бул тууралуу маркумдун атасы Эркара Жумабаевдин адвокаты Талгат Есимов билдирди.

Анын айтымында, үч шектүүгө карата “Ден соолукка атайылап оор залал келтирүү” беренеси боюнча кылмыш иши козголду. Азыр алар камакта.

“Азырынча үч адам кармалды. Учурда бул ишке тиешеси бар башка адамдар такталууда”, – деген адвокат.

Кийинчерээк бул маалыматты шаардык полиция департаменти ырастады. Бүгүнкү күндө ишти прокуратура менен Улуттук коопсуздук башкармалыгы иликтеп жатат.

Буга чейин Телеграмдагы Kozachkov offside каналы кармалган үч адамдын аты-жөнүн жарыялаган. 11-декабрда “Азаттыкка” курган маегинде адвокат бул маалыматты тастыктады. Кармалгандар криминалдык милиция бөлүмүндө иштешет. Жергиликтүү басылмалардын маалыматына караганда, алар Чымкент шаардык полиция департаментинин кызматкерлери.

Чымкент шаардык полиция департаментинин башчысы Ералы Жумаханбетов 11-декабрда полиция кызматкерлери Жумабаевге күч колдонгонун ырастап, аларга каршы кылмыш иши козголгонун билдирди.

8-декабрда каза болгон Нурболат Жумабаев тергөө үчүн Чымкент шаардык полиция департаментине жеткирилип, сөөгү 11-декабрда кичи мекени Костанайга коюлган. Маркумдун жакындары аны полиция кызматкерлери ур-токмокко алган деп эсептешет. Буга чейин полиция “шектүү сурак учурунда өзүн жаман сезип, “Тез жардам” келгенге чейин эс-учун жоготкон” деп билдирген.

ИИМдин башчысы Ералы Жумаханбетов журналисттерге “прокуратура жана коопсуздук кызматы бардык жагдайларды текшерип чыкканын, көзгө көрүнгөн жарааттар жок” экенин билдирди. Маркумдун сөөгүн көргөн жакындары анын денеси канталап кеткенин айтышкан.

Жумабаев шаардагы автоунаа уурдоо боюнча бир нече кылмышка шектүү катары полиция департаментине жеткирилген болчу.

WWW.