2,820 Бардыгы /

ЖАЛАЛ-АБАД. Таш-Көмүр ШИИБдин начальниги милициянын полковниги Азенбек Козукеевдин демилгеси менен “Менин милициям мени коргойт” аталышындагы сүрөт тартуу конкурсу өткөрүлдү. Жалал-Абад ОИИБдин басма сөз кызматынын маалыматына ылайык, Таш-Көмүр шаардык билим берүү бөлүмү менен биргеликте уюштурулган иш-чарага мектеп окуучулары катышышты. Конкурстун алкагында жаш өспүрүмдөргө кылмыштуулуктан алыс болуу керектиги эскертилди. Ошондой эле милиция кызматкерлери жаштарды мекенди сүйүүгө жана коргоого чакырышты. Мындан сырткары шаардагы 8 орто мектептин окуучулары арасында спорттун волейбол түрү боюнча мелдеш өткөрүлдү. Спорттук таймаштын жыйынтыгында 1-орунду №4 Токтогул, 2-орунду №7 К.Күзембаев, 3-орунду №3 Тоголок Молдо атындагы орто мектептеринин окуучулары багындырышты. Жеңүүчүлөргө уюштуруучулар тарабынан диплом жана баалуу белектер тапшырылды. Өз кезегинде окуучулар мындай спорттук таймаштарды өткөрүп турууну каалашарын айтышып, уюштуруучуларга ыраазычылыктарын билдиришти.