3,420 Бардыгы /

ОШ. Ош облустук ички иштер башкармалыгы Араван районунда Кыргызстанда ишмердигине мыйзам чегинде тыюу салынган “Йакын-Инкар” диний экстремисттик кыймылынын сегиз мүчөсү кармалгандыгын ачыктады.

         Ош облустук милициясынын маалыматына караганда, алар Араван районунун тургундарынн арысында кадимкидей үгүт-насаат иштерин жүргүзүп жүрүшкөн. Шектүүлөр “Йакын-Инкар” кыймылынын идеологияларын жайылткандыгы үчүн буга дейре Бишкек шаарынын Октябрь райондук соту тарабынан сот жообуна тартылганы дагы ырасталды. Кармалгандардын кичүүсү – 21, ал эми улуусу – 53 жашта. Төртөө – Араван районунун, экөө – Баткен облусунун Кадамжай, дагы калган экөө – Ош облусунун Ноокат районунун тургундары.

         Төрт фактынын негизинде кылмыш иши козголуп, булардын экөө сотко өткөрүлгөн. “Йакын инкар” диний агымы – “Таблиги жамаат” уюмунун ичинен бөлүнүп чыккан өзүнчө топ. Анын мүчөлөрү өздөрүн “Пайгамбардын жолун жолдоочуларбыз” деп эсептешет. Бул диний агым 2017-жылы сот тарабынан Кыргызстанда экстремисттик диний уюм деп таанылган.

         Мындан тышкары сот тарабынан 2003-жылдан бери баш-аягы 21 диний бирикменин ишмердигине террорчул жана экстремисттик уюм катары Кыргызстандын аймагында таптакыр тыюу салынган. Буга “Жабхат ан-Нусра”, “Жайшу л-Махди”, “Ансару л-Лах”, “Хизб ут-Тахрир ал-Ислами”, “Жихад тобу” жана “Чыгыш Түркстан Ислам кыймылы” сыяктуу эл аралык террордук жана экстремисттик уюмдар киргизилген.

         Алишер ТОКСОНБАЕВ, өз кабарчы