1,758 Бардыгы /

Москвада полиция кызматкерлерине кол салууга айыпталган эки тажикстандыктын кызыкчылыгын үч адвокат коргойт. Орусия бийлиги 17-февралда 18 жана 21 жаштагы ага-ини «Тульская» метро станциясында укук коргоо кызматкерлерине кол салганын кабарлаган.

Соцтармактарга жарыяланган видеожазууда полициячылар бир жигиттин колун кайрып жатканын көрүүгө болот. Ошол маалда алардын жагына башка бир улан жүгүрүп келип, полиция кызматкерлерине кол көтөргөн.

Айыпталуучу Саидакрам менен Умардын атасы Расулжон Хамроев алар орус бийлиги сыпаттап жаткандай денгээлде күнөөлүү эместигин, коргонууга аргасыз болушканын айтууда. Анын билдиришинче, Тажикстан элчилиги ага-инини коргоо үчүн адвокат жалдап берди, тажик мигранттары дагы эки адвокаттын кызмат акысын төлөштү.

Орусиянын Москва шаары боюнча тергөө комитети кармалгандардын бири тек-жайын тактоо үчүн полиция бөлмөсүнө баруудан баш тартканын жана полиция кызматкерлерине каршылык көрсөткөнүн, экинчиси полициячыларга атайлап кол көтөргөнүн билдирген.

Сурак учурунда Саидакрам полиция кызматкерлерине каршылык көрсөтпөгөнүн айткан.

«Алар сынган колумдан кармашканда: «Колуңарды тарткыла!» деп гана айткам. Андан соң ушунун баары башталып кетти», – деген.

Саидакрам менен Умар ушул тапта тергөө абагында, адвокаттар алар менен жолугушууга уруксат алышты. Тажикстан жарандарына каршы «Бийлик өкүлүнө карата күч колдонуу» беренеси менен кылмыш иши козголду. Аларга беш жылга чейин эркинен ажыратуу жазасы берилиши мүмкүн.

WWW.