1,545 Бардыгы /

Орусиянын Федералдык бажы кызматы Кыргызстандан барган жүк ташуучу автоунаалардын айдоочуларынан жүктөлгөн товарларды түшүрүү талап кылынып жатканын четке какты. Бул тууралуу Кыргызстандын Мамлекеттик бажы кызматынын басма сөз кызматы кабарлады.

Мекеменин маалыматына караганда, бул маселе боюнча Кыргызстандын Бажы кызматынын төрагасы Орусиянын Бажы кызматынын жетекчилиги менен телефондо сүйлөшкөн.

“Орус тарап “Маштаково” бажы бекетиндеги товарларды түшүрүү операцияларына Орусиянын Бажы кызматынын эч кандай тиешеси жок экенин, бүгүнкү күндө Кыргызстандан Орусияга импорттолуп жаткан айыл чарба продукциясына жана башка товарларга “жашыл коридор” иштеп жатканын жана мобилдик топтор мындай товарларды текшербегенин” белгиледи”, – деп жазылган мекеменин билдирүүсүндө.

Өткөн жумада соцтармактарга Орусиянын бажы кызматкерлери Кыргызстандан барган жүк ташуучу автоунаалардын айдоочуларынан жүктөлгөн товарларды түшүрүүнү талап кылып, болбосо өлкө аймагына өткөрбөй жатышканы тартылган видеолор жарыяланган.

17-мартта Кыргызстандын Москвадагы элчилиги товарларды мажбурлап түшүртүү көрүнүшү Казакстан менен Орусиянын Оренбург облусунун чек арасындагы “Маштаково” постунда болуп жатканын билдирип, кыргызстандыктардын укугун коргоо боюнча тиешелүү иштерди жүргүзүп жатканын маалымдаган.

Кыргызстан менен Орусия Евразиялык экономикалык биримдиктин мүчөсү. Бул уюмга мүчө мамлекеттердин ортосунда товарлар эркин жүгүртүлүшүнө шарт түзүлүшү керек. Бирок адистердин айтымында, Орусия уюмдагы өнөктөштөрүнө карата маал-маалы менен айрым чектөөлөрдү киргизип келет. Буга чейин Россельхознадзор фитосанитардык көзөмөлдүн талаптарына жооп бербейт деген жүйө менен Кыргызстандын жашылча-жемиштерин Орусиянын аймагына киргизбей койгон учурлар болгон.