930 Бардыгы /

Өзбекстанда 18-майдан тартып жандана турган ички аба каттамдары үчүн жүргүнчүлөрдөн COVID-19 тестинен өткөндүгү тууралуу маалымкат талап кылынат. Бул тууралуу UzAirways авиакомпаниясынын басма сөз кызматы билдирди.

«Каттамдарга коронавирус инфекциясы жок экенин ырастаган тесттин жыйынтыгын көрсөткөн жүргүнчүлөр гана киргизилет. Тест каттамга чейин 120 саат аралыгында Санитардык-эпидемиологиялык борбордо тапшырылышы керек. Мындан тышкары жүргүнчүлөр каттоо учурунда жана учактын ичинде медициналык беткап, колкап кийип, социалдык аралыкты сактоосу зарыл», — деп жазылган компаниянын билдирүүсүндө.

«Өзбекстан темир жолдору» ишканасынын басма сөз кызматы поезд жүргүнчүлөрү үчүн да ушундай эле талаптар бар экенин билдирди.

Өзбекстан башка өлкөлөр менен жүргүнчү ташыган транспорт түрлөрүн 16-марттан, өлкө ичиндеги каттамдарды 27-марттан тартып токтоткон.

Акыркы маалыматтар боюнча өлкөдө коронавирус жуктуруп алгандардын саны 2735 адамга жетти. Алардын ичинен 12 бейтап каза болду.