3 Бардыгы /

Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев Чаткал районунун Чакмак-Суу айылынын Куру-Тегерек участкасында жайгашкан “Кичи-Чаарат” жабык акционердик коому, Терек-Сай алындагы “Эти Бакыр Терексай” жана Ала-Бука районунун Ынтымак айыл аймагында жайгашкан “КАЗ Минералз Бозымчак” алтын кен компанияларынын ишмердүүлүгү менен таанышты.

Облус башчысы тоо-кен казып алуу технологиялары, коопсуздук чаралары, өндүрүш жана кайра иштетүү тартиби, экология жана социалдык жоопкерчилик багытында аткарылган иштерди көрдү.

Чакмак-Суу айылынын Куру-Тегерек участкасында жайгашкан “Кичи-Чаарат” жабык акционердик коому 2019-жылы ачылып, инвестициялык көлөмү 400 млн АКШ долларын түзөт. Өндүрүштүн кубаттуулугу жылына 1 млн 800 миң тонна руданы кайра иштетет. Мекемеде жалпы 356 жумуш орундары болуп, анын 293 жергиликтүү жашоочулар.

Кыдыруунун алкагында ыйгарым укуктуу өкүл “Эти Бакыр Терексай” алтын ылгалоочу фабрикасына барды. Аталган мекемеге тартылган инвестициянын суммасы 350 млн АКШ долларын түзөт. Учурда фабрикада 650 жумуш орундары бар. Мындан сырткары, Тилек Текебаев 1336 адам эмгектенген Ала-Бука районунун Ынтымак айыл аймагындагы “КАЗ Минералз Бозымчак” өндүрүштүк мекемесиндеги иш ыргагын көрдү.

Облус өкүлү тоо-кен компаниялардын жетекчилерине техникалык коопсуздук жана экологиялык талаптардын так аткарылышы зарылдыгын эскертти. Компаниялар тарабынан облус башчысына өндүрүштү кеңейтүү, тийиштүү кадрлардын жетишсиздик көйгөйү бар экени айтылды.

Тилек Текебаев, аймактын негизги киреше булагы болгон кен компанияларда иштөө үчүн бир катар багыттар боюнча кесиптик окутууларды ачуу боюнча жергиликтүү бийликке тапшырмаларды берди.

Белгилей кесек, 2024-жылы Жалал-Абад облусу боюнча тоо кен тармагынан 30 млрд 519,1 млн сомдук продукция өндүрүлүп, 114 пайызга жеткен.