1,405 Бардыгы /

“Кыргызнефтегаз” ААКтын эгемендүүлүктүн 30 жылдык тарыхында өндүрүштүк жана финансылык көрсөткүчтөрү биринчи жарым жылдыкта рекорддук чекке чыкты. Бул тууралуу аталган ишкананын басма сөз кызматы маалымдады.

“Кыргызнефтегаз” ААКты ушул жылдын биринчи жарым жылдын жыйынтыгы менен 949 миллион 500 миң сом баланстык киреше тапканга жетишилди. “Кыргызнефтегаз” ачык акционердик коом болуп түзүлгөндөн бери баланстык киреше 949 миллион 500 миң сомго чыккан эмес. Бул көрсөткүч ишкананын тарыхында биринчи жолу болуп жатат. Тактап айтканда белгиленген планга салыштырмалуу 503 млн. 600 мин сомго көп киреше табып, 6 айлык планды 213% аткарууга жетишти.    

Ошондой эле чийки нефти өндүрүү планы 2021-жылдын 6 айында 64 099 тонна каралса, ал эми иш жүзүндө 82 533 тоннага аткарылды. Башкача айтканда планга салыштырмалуу 18 434 тоннага ашыкча өндүрүлдү. Бул деген 6 айлык план 129% аткарылганын түшүндүрөт.

Мамлекетке болгон төлөмдөр өз учурунда аткарылууда. Биринчи жарым жылдыкта салык төлөм план боюнча 285 млн. сом болсо, анын ордуна 511 млн. сом төлөндү. Учурда мекеменин  карыздары жок. Бардык чегерүүлөр төлөндү. Бүгүнкү күндө ишканада бардык жумуштар боюнча оң тенденция байкалып, казып алуу, өндүрүү, кайра иштетүү көрсөткүчтөрү өсүүдө. Пандемиянын залакасына  карабай биринчи жарым жылдыктын мерчемделген пландарды ашыгы менен аткарып келүүдө.

Белгилей кетсек, “Кыргызнефтегаз” ААКтын төрагалык кызматын жыл башынан бери Мелис Тургунбаев аркалап келет. Мекемедеги кесипкөй жумушчулардын жана башкармалыктын туура уюштуруучулук эмгеги менен жогорудагы ийгиликтерге жетишүүдө. Ушул темп менен мунай өндүрүлүп барылса, жыл аягына чейин 200 миң тоннага жакын чийки мунай өндүрүү пландалууда. Бул көрсөткүч “Кыргызнефтегаз” ААКтын тарыхында гүлдөп турган союз учурундагы жогорку көрсөткүчтөргө барабар болмокчу.