2,217 Бардыгы /

          БИШКЕК. «Тарыхтан калган элестер» аттуу таш айкелдеринин мыкты эскизин тандоо үчүн республикалык сынакка катышууну каалаган 50гө чукул скульптор билдирүү калтырды. Булардын арасынан 17 эмгек иргелип, эми нукура таш айкелдер жасалат. Бул туурасында айкелчи Бакыт Иманбаев билдирди.

          Баса, таш симпозиумунун уюштуруучуларынын бири, бедизчи Бакыт Иманбаев скульптура (бедиз) тарыхты кийинки муунга жеткирип, адамга тарбия бере турган искусствонун заманбап түрү экендигин дагы жашырган жок! Анын баамында, Кыргызстанда мыкты таш айкелдерди жасай ала турган кесипкөй жана дагы таланттуу жаш скульпторлор (бедизчилер) дээрлик жетиштүү.

          – Кыргызстанда XVII таш симпозиуму өткөрүлгөнү турат. Менин билишимче, 1984-жылдан бери бул иш-чараны Тургунбай Садыков атындагы Улуттук көркөм сүрөт Академиясы жана Эл аралык скульпторлор коому уюштуруп келишкен. Эми Ош шаарында өтө турган таш симпозиумуна жаш бедизчилерди тартуу тапшырмасы катуу коюлду. Бул бедизчилердин бири-бири менен тажрыйба алмашуусу үчүн абадай зарыл! Жаштардын тарыхка мамилеси, ошол учурдагы окуяларды көрө билиши, аны ташка чегип чагылдарышы каралат. «Тарыхтан калган элестер» аттуу таш айкелдердин мыкты эскизин тандоо үчүн республиканын жети дубаны боюнча сынак дагы жарыяланды. Сынакта катышуучулардын арасынан 17 эмгек тандалып, Ош шаарында бир ай бою кичинекей макеттер көлөмү 1,5-2 метрлик ташка түшүрүлөт.

          Айтмакчы, аталган маанилүү иш-чараны Маданият, маалымат, спорт жана жаштар саясаты министрлиги менен Ош мэриясы уюштуруп, а түгүл каржылап дагы жатышат. Андыктан, Жобо боюнча, таш айкелдер Ош шаарында жайгашат. Кыргыз Республикасынын эгемендүүлүгүнүн 32 жылдыгы дагы Ош шаарында белгиленгени турат. Таш айкелдердин бет ачаары ошол күнгө туураланат.  Ал таш айкелдер 10-августка чейин жасалып бүтөөрү айтылууда.

Алишер ТОКСОНБАЕВ, өз кабарчы