1,905 Бардыгы /

          БАТКЕН. Баткендеги меуктептердин быылкы бүтүрүүчүлөрүн ЖОЖдорго кабыл алууда өзгөчө жеңилдиктер каралды. Бул туурасында президентти Баткен облусундагы ыйгарым укуктуу Өкүлү Абдыкарим Алимбаев кабарлады.

          Абдыкарим Алимбаевдин айтымында, Баткен облусунда жалпы республикалык тестирлөөдөн 100 упай алган бүтүрүүчү бюджеттик негизде, 95 упай алганы келишимдик негизде жогорку билим алуусуна мүмкүнчүлк түзүлдү. Анткени, Баткен облусунун башчысы Абдыкарим Алимбаев менен билим берүү жана илим министри Каныбек Иманалиевдин макулдашуусуна ылайык министрдин “Баткен мамлекеттик университетинин абитуриенттери үчүн ЖРТнын босого баллын бекитүү жөнүндө” буйругу жаряланган. Буга ылайык, Баткенде 2023-2024-окуу жылына талапкерлерди кабыл алууда гранттык негизде 100 упай, келишим боюнча акы төлөнүүчү окутуунун бардык формаларына 95 упай бекитилди. Бул жеңилдиктин эё башкы максаты: акыркы эки жылда Баткен облусунун чек ара аймактарындагы куралдуу жаңжалдын кесепеттерин эске алуу менен мектеп бүтүрүүчүлөрү үчүн жогорку билим алуу мүмкүнчүлүгүн кеңейтүү.

          Анткени, 2022-жылдын 14-17-сентябрь күндөрү чек арадагы жаёжалдан кийин жабыр тарткан жарандар дароо эвакуацияланып, окуучулар башка мектептерге окууга мажбурланган. Ал эми Лейлек районун Максат орто мектеби, Баткен районунда Б.Ходжаев жана Достук орто мектептери күйүп-өрттөнүп, колдонууга таптакыр жараксыз кейипти кийгендиктен, окуучулар жыл бою онлайн режиминде гана окушту.

          Белгилей кетчү жагдай: буга чейин дагы Баткен облус башчысынын сунушу менен 2021-2022-окуу жылында ЖРТнын босого баллын төмөндөтүү менен Баткен мамлекеттик университетине гранттык орундар берилип, чек аралаш айылдардан 144 студент бюджеттик, 266 студент келишимдик негизде окууга кабыл алынган.

Алишер ТОКСОНБАЕВ, өз кабарчы