1,446 Бардыгы /

ОШ.  Бүгүн Ош шаарындагы Батырали Сыдыков атындагы Кыргыз-Өзбек эл аралык университетинде Кыргызстан менен Өзбекстандын жогорку окуу жайларынын ректорлорунун биринчи форуму башталды.

Ошентип, агартуу форумунун салтанаттуу ачылышына Кыргыз Республикасынын мамлекеттик катчысы Сүйүнтбек Касмамбетов, мурдагы премьер-министр, Кыргыз Республикасынын Баатыры Апас Жумагулов, Кыргыз Республикасынын билим берүү жана илим министринин биринчи орун басары Уланбек Усеков, Өзбекстандын жогорку билим берүү, илим жана инновациялар министринин орун басары Комилжон Каримов, Кыргызстандын Өзбекстандагы элчиси Муса Жаманбаев жана Өзбекстандын  Кыргызстандагы элчиси Хуршид Мирзахидов катышышты.

Буга улай аталган иш-чаранын жүрүшүндө Кыргыз-Өзбек эл аралык университетине ысмы ыйгарылган Батыралы Сыдыковдун айкели дагы ачылды. Анда Батыралы Сыдыковдун жогорку кесипкөйлүгү, ишке болгон өзгөчө жоопкерчиликтүү мамилеси, эки элдин ынтымагын чыңдоого чыныгы элдик дипломатияны чеберчилик менен колдоно билүү жөндөмдүүлүгү эскерилди.

Кыргызстан менен Өзбекстандын жогорку окуу жайларынын ректорлорунун биринчи форумунун иши коңшу мамлекеттердин жогорку окуу жайлары ортосундагы кызматташтыкты мынданы ары  өнүктүрүүгө, ошондой эле биргелешкен бир катар илимий долбоолорду жүзөгө ашырууга гана багытталган. «Жогорку билим берүү тутумундагы интеграция, кызматташтык жана инновациялар» аталышындагы иш-чарага эки өлкөнүн 70 жакын ЖОЖ ректорлору жана ири билим берүү уюмдарынын өкүлдөрү катышып жатышат.

Алишер ТОКСОНБАЕВ, өз кабарчы