1,089 Бардыгы /

Ош мамлекеттик университети (ОшМУ) мындан ары өлкөбүздөгү 7 орто жана башталгыч билим берүү мекемесин жетекчиликке алып, аларга ар тараптуу көмөк дагы көрсөтөт. Бул туурасында аталган ЖОЖдун ректору, профессор Кудайберди Кожобеков билдирди.

          Маалыматка караганда. ОшМУ Кыргызстандын Түштүк башкалаасындагы №52-Кыргыз-Түрк достугу мектеп-лицейин, «Билим» лицейин, «Зирек» башталгыч билим берүү мекемесин, Ош облусундагы №87- Сыдык Алайчы атындагы инновациялык мектеп-гимназия комплексин, «Ноокат» гимназиясын, Ак Суу орто мектеби, Чүй облусундагы Байтик Канай уулу атындагы орто мектебин түздөн-түз жетекчиликке алды.

          Ошентип, 2024-жылдын январь айынан тартып ОшМУнун базасында бул орто жана башталгыч билим берүү мекемелеринин мугалимдери үчүн атайын окуу курстары дагы уюштурулат. Ошондой эле университеттин лицей-гимназиялары менен жеринде таанышып, тажрыйба алмашышат. Андан тышкары аталган билим берүү мекемелеринин ортосунда мугалимдердин мобилдүүлүгү кошо жүзөгө ашырылат. Ушуга байланыштуу ОшМУнун жетекчилигине бекитилген билим берүү мекемелеринин директорлору менен атайын кеңешме өткөрүлүп, ага университеттин орто кесиптик билим берүү департаментинин директору Чыңгызбек Мамажакып уулу катышты. Анда аталган билим берүү мекемелери менен өз ара кызматташуу, мугалимдердин квалификациясын жогорулатуу, тажрыйба алмашуу, окуучуларды ЖРТга даярдоо боюнча маселелер кенен-чонон талкууланды. Ошондой эле мындан ары кызматташуунун жол картасын дагы иштеп чыгып, аны такай аткаруунун моделдери сунуш этилди.

          Аталган иш-чаралар Билим берүү жана илим министрлигинин өзгөчө макамга ээ ЖОЖдорунун жетекчилигинде жалпы билим берүүчү мектептердин дараметин ого бетер жогорулатуу, жогорку окуу жайлар менен тыгыз өнөктөштүктө окутуунун натыйжаларын жакшыртуу боюнча чыккан буйругунун алкагында гана жүзөгө ашырылууда.

Алишер ТОКСОНБАЕВ, өз кабарчы