855 Бардыгы /

          Ош мамлекеттик университетинин (ОшМУнун) 85 жылдык мааракесине карата илимий китепкананын алкагында «Борборлоштурулган окуу залы» ишке киришти. Анын ачылыш аземине окуу жайдын ректору, профессор Кудайберди Кожобеков, ОшТУнун жана ОшМПУнун ректорлору, китепкана жетекчилери, Батыралы Сыдыков атындагы Кыргыз-Өзбек Эл аралык университетинин өкүлдөрү, Ош шаарындагы китепканалардын жетекчилери, аталган университеттин професордук-окутуучулук курамы, студенттер, ошондой эле окурмандар дагы катышыты.

Коноктор китепкананын заманбап жасалгасын, окурмандарга түзүлгөн мыкты шарттарын мүмкүнчүлүктөрүн көрүштү. Окуу залынын ичинде борборлоштурулган окуу залы, STUDCLUB студенттердин профессионалдык жеке өнүгүү борбору, Scops илимий-изилдөө борбору, электрондук ресурстар бөлүмү өңдөнгөн жаңы багыттар дагы кеңири  камтылган. STUDCLUB студенттердин профессионалдык жеке өнүгүү борбору эки өңүттө иш алып барат. Факультеттердин, институттардын жана колледждердин студенттери үчүн мыкты инсан болуп калыптануусуна багыт берген тренингдер, мастер-класстар кошо өткөрүлөт. Ал үчүн тыштан  жана дагы окуу жайдын ичинен атайын адистер конок сыңары үзгүлтүксүз чакырылып турат.

Мобилдүүлүккө чыгып жаткан студенттер үчүн салым кошкон англис тилинде баарлашуу кулабдары дагы уюштурулат. Клубда чет өлкөлөрдөн келген 3 ыктыярчы мугалимдер билим беришет. Scops илимий-изилдөө борборунда илимий изилдөө иштерин жүргүзүп жаткан окутуучулар үчүн шарттар түзүлгөн.

• Ушул тапта аталган китепкананын жалпы ишмердүүлүгү,

китепканачылардын орду толук бойдон санариптештирилген. Окурмандар факультет жана колледждеринде туруп эле смартфондор аркылуу китептерге буюртма берип, каалаган китептерди алып окуусуна дагы шарттар жаратылды. Мындан тышкары окуу залындагы акыркы үлгүдөгү компьютерлер аркылуу электрондук китептерди окуса болот. Биз китеп менен окурмандын, окурман менен китептин ортосундагы байланыштарды чындап автоматташтырууга дагы жетиштик. Буга чейин китептерди китепканачылар аркылуу сурап алышса,  а азыр баары ачык колдонууга коюлду. Кааласа, электрондук, кааласа өздөрү келип алып, окуп кайра ордуна койгон иш-аракеттер жүрүп жатат, – деди ОшМУнун илимий китепканасынын директору Азамат Орозбаев.

Баса, ОшМУнун тарыхы менен жашташ илимий китепкананын фонду 500 миңден ашуун китепти түзөт. Электрондук китептердин саны 3000ге чукул. Күн сайын эң көп окулган жана сунуш түшкөн китептер заманбап техникалардын жардамында электрондоштурулуп дагы турат.

Алишер  ТОКСОНБАЕВ, өз кабарчы