216 Бардыгы /

ЖАЛАЛ-АБАД. Бүгүн, 5-апрелде Жалал-Абад шаарынын “Эркиндик” аянтында 2010-жылдагы апрель окуясы эскерилди.

Эскерүү иш-чарасына КР Президентинин Жалал-Абад облусундагы өкүлү Абсаттар Сыргабаев, шаар мэри Эрнисбек Ормоков, мекеме-ишканалардын жетекчилери, апрель революциясынын катышуучулары, каза болгондордун жакындары, мекеме-ишкана жамааттары, окуу жайлардын мугалимдери жана шаар тургундары, жаштар катышты катышты.

Анда сөз сүйлөгөн облус өкүлү 7-апрель-Элдик революциясы мамлекеттин тарыхындагы бурулуш болгон маанилүү окуялардын бири экенин белгиледи.

“7-Апрель – Элдик революция күнү Кыргыз эли эркиндик, адилеттүүлүк жана мыйзамдуулук үчүн бийликке каршы чыккан тарыхый окуя. Анын натыйжасы мамлекеттин андан аркы өнүгүүсүнө ишенимдүү кадам таштоо менен демократия принциптерин ишке ашыра алды. Мамлекетебизде эч качан мындай кандуу окуялар кайталанбасын. Ар дайым элибизде аманчылык, жергебизде тынчтык болсун”, –деди А. Сыргабаев.

Шаар мэри Эрнисбек Ормоков 14 жыл мурда 7-апрель күнү кыргыз эли эркиндик, адилеттүүлүк жана мыйзамдуулук үчүн бийликке каршы чыгып, тарыхый окуя орун алганын айтып, анда курман болгон инсандардын элеси түбөлүк сактала турганын белгиледи.

Эскерүү иш-чарасында 7-апрель-Элдик революциясында курман болгондордун эскерүү тактайчасына гүлчамбар коюлуп, куран окулду.

Белгилей кетсек, Кыргызстанда 2010-жылы 7-апрелде 87 киши окко учкан. 100дөн ашуун адам жаракат алган. Ал эми Жалал-Абад облусунан 9 адам каза болуп, 67 адам ар түрдүү жаракаттарды алышкан.

Кыргызстанда бул күн “7-апрель – Элдик апрель революциясы” деп аталып, жыл сайын эскерүү иш-чарасы уюштурулуп келет.