“ЖАШТАР -ӨЛКӨНҮН БАШКЫ ТАЯНЫЧЫ, БАКУБАТ КЕЛЕЧЕГИ!”

3 Бардыгы /

Добул Шабданов атындагы Ала-Бука райондук балдардын билим берүү борбору, Кыргыз Республикасынын Президентинин «Инсандын руханий-адеп-ахлактык өнүгүүсү жана дене тарбиясы» жөнүндө жарлыгы, Кара-Кыргыз автономиялуу облусунун 100 жылдыгы жана Кыргыз Республикасынын Мамлекеттик тил күнүнүн 35 жылдыгына карата “Ачык эшиктер күнү” жана “Мамлекеттик тил-жалпы улуттук кенч” темасында уюштурулган иш-чара эң жогорку деңгээлде өттү.

Иш-чаранын жүрүшүндө келечек ээлери болгон окуучуларды улуттук баалуулуктарга, каада-салт, үрп-адат, нарк-насилибизге, тилибизге, маданиятыбызга тарбиялоо максатында кыргыз элдик ырлары, кыргыздын улуттук бийлери, комуз күүлөрү, көркөм окуулар таланттуу окуучулар тарабынан даярдалып, коомчулуктан келген конокторго тартууланды. Иш-чарага катышкан ата-энелер борбордун эмгек жамаатына өз ыраазычылыктарын билдирип өтүштү.

Өнөрлүү окуучулар тарабынан кыргыз элинин маданиятын, элдик өзгөчөлүгүн, улуттук баалуулуктагы артыкчылыктарды чагылдырган улуттук көргөзмө уюштурулду. Өзгөчө табигый жүндөн жасалган көргөзмөлөр, сүрөттөр келген конокторго кызыгууну арттырды.

Иш-чарада Кыргыз Республикасынын Билим берүү жана илим министрлиги жана “Балажан” эстетикалык тарбия берүү окуу-усулдук борбору тарабынан жыл сайын уюштурулуп жаткан “Ысык-Көл досторун чакырат-2024” эл аралык этно-карновалга жана “Ысык-Көл балдардын көзү менен -2024” эл аралык слетко катышып, 1-2-3-орундарды багындырышкан борбордун таланттуу окуучулары жана ийрим жетекчилери, кызыктыруучу белектер жана Билим берүү жана илим министрлиги тарабынан берилген ардак грамоталар менен сыйланышты.

Азыркы коом ар тараптуу өнүккөн, чыгармачыл инсанды талап кылууда. Балдардын билим берүү борбору жаштарга кошумча билим, өнөр берүү менен катар биримдикке тартуу, өсүп келаткан муунду өзүн-өзү таанууга, патриоттуулукка тарбиялоо, өз эне тилинин руханий дөөлөт, байлык катары мамиле кылуусун күчөтүү максатында ишмердүүлүк жүргүзүп келүүдө.

Жаш өспүрүмдөрдү улутту улут кылган, улут учун узартып, улут наркын арттырган тарыхыбызга, тилибизге, маданиятыбызга, ата-баба тарых-таржымалына таянып тарбиялоо, борбордун негизги максаттарынын бири.

Жаштар -өлкөнүн башкы таянычы, бакубат келечеги. Ошондуктан ар бирибиз келечек урпактарыбыздын камын көрүп, мекенчилдикке, атуулдукка тарбиялашыбыз зарыл!