69 Бардыгы /

Бүгүн, 4-декабрда  Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев Ала-Бука районунун Айры-Там айыл аймагынын Кара-Үңкүр айылында курулган 150 орундуу №30 Кара-Үңкүр жалпы орто билим берүүчү мектебинин ачылыш аземине катышты.

№30 Кара-Үңкүр жалпы орто билим берүүчү мектеп райондук өнүктүрүү фондунун эсебинен курулуп, ички эмеректери жана жасалгалоо иштери жергиликтүү бийлик жана демөөрчүлөр тарабынан каржыланган. Ошондой эле, мектептин ашканасы Бириккен Улуттар Уюмунун Өнүктүрүү Программасы тарабынан керектүү жабдуулар менен камсыздалган.

Иш-чара алкагында облус башчысы айыл тургундарын жаңы мектептин ачылышы менен куттуктап, аталган билим уясы балдардын сапаттуу билим алуусуна шарт түзөөрүн белгиледи.

Мындан тышкары, 2025-жылы Ала-Бука районунда аткарылган негизги иштерге токтолуп, аймактын социалдык-экономикалык өнүгүүсү боюнча жүргүзүлүп жаткан чаралар тууралуу маалымат берди. Ошондой эле, 2026-жылга карата Ала-Бука районунда ишке ашырыла турган приоритеттүү долбоорлор тууралуу да айтып өттү.