2,202 Бардыгы /

 АЛА-БУКА. Ала-Бука районунун Көк-Таш айылын эл таланттардын алтын бешиги дешет.

Анткени аталган айылдан элге белгилүү Абдылаким Артыкбаев, Кенжебек Рахманбердиев, Акмат Молдобеков, Ороскул Эгемова, Түмөнбай Колдошов сыяктуу таланттар чыккан айыл. Айылда эски маданият сарайы болгон, ал учурдун талабына жооп бербей калгандыктан жергиликтүү бюджеттин эсебинен жаңы маданият сарайын куруу чечимине келишти. Айыл эли да бул ишке ыраазы. Жаңы маданият сарайы эки кабаттуу салынып, 400 орундуу болот. Андан сырткары ийримдер иштей турган 4 бөлмө, машыгуу залы. Маданият үйүнүн курулушу жергиликтүү бюджеттин эсебинен 63 миллионго тендер жарыяланып, аны “Сириус-Строй”  курулуш фирмасы утуп алып иш баштады. Курулуштун пайдубалын түптөөгө айыл аксакалдары, райондун акими катышып капсула салылышып, алгачкы бетондорун таштап беришти. Келерки жылга бардык заманбап шарттары менен куруп бүткөрүүнү куруучулар убада кылышты.

Ала-Бука районунда маданият тармагына өткөн эки жылда өзгөчө көңүл бурулууда. Өткөн жылдарда Ажек айылында бир маданият үйү курулуп пайдаланууга берилген. Падек айылында да эки кабаттуу 400 орундуу маданият үйү курулуп бүтүү алдында турат. Көк –Таш айылында курулушу башталды.

Ал эми Өрүктү айылындагы маданият үйү капиталдык ремонттон чыгууда. Бул тууралуу райондук маданият бөлүмүнүн  башчысы Таалайбек Жунусов төмөнкүлөрдү билдирди.

“Кок-Таш айыл аймагында быйыл курулуштардын жылы болчудай, 20 чакырымдан ашык жерден канал салынып, айылга суу алып келүү иши жүрүп жатат, андан сырткары 1,5 километрге жол асфальт болмокчу. Булак-Башы айылында 75  орундуу эки кабат спорт залы менен мектеп курулуп бүтүү алдында турат. Андан сырткары да арбын иш бар”,- дейт айыл аймагынын башчысы.

Көк-Таш айыл аймагы райондогу өзүн-өзү каржылаган, бюджетинде жүз миллиондон ашык каражаты бар айыл өкмөт. Демек, бул айыл аймакта али аткарылуучу иштер арбын. Жылдан жылга элдин турмуш шарты жакшырып, айылдын келбети өзгөрүп жатканы элге да байкалып, жакшы жашоого дем берүүдө. 

Абдымомун КАЛБАЕВ, Ала-Бука  району