1,272 Бардыгы /

         БАТКЕН. Баткен шаарында өткөрүлүп жаткан «Салттуу музыка жумалыгы»  жана «Достук» фестивалынын үчүнчү күнүндө  улуттук кийимдер парады менен башталып, кол өнөрчүлөрдүн көргөзмө-жарманкеси менен уланды.

         Ушундан соң фестивалдын Гала-Концерти башталып, ага Кыргыз Республикасынын Маданият маалымат жана туризм министри Кайрат Иманалиев жана Кыргыз Өкмөтүнүн Баткен облусундагы ыйгарым укуктуу Өкүлү Өмүрбек Суваналиев катышып, бир катар маданият кызматкерлерине министрликтин жана облустук Өкүлчүлүктүн сыйлыктарын тапшырышты.

Аталган фестиваль үч күнгө созулуп, маданият жана көрокөм өнөр өкүлдөрү, оозеки салттагы профессионалдык музыкалык искусствонун айтуучулук, Манасчылык, дастанчылык жана акындык өнөр, аваздык-аспапчылык, кол өнөрчүлүк  багыттары боюнча таланттарын тартуулашты.  Баса белгилөөчү жагдай: аталган фестивалга кошуна Өзбекстан жана Кытай мамлекетинин дагы маданият өкүлдөрү катышышты.

«Салттуу музыка жумалыгынын»  жана «Достук» фестивалынын соңунда Кыргыз Өкмөтүнүн Баткен облусундагы ыйгарым укуктуу Өкүлү Өмүрбек Суваналиев Кыргыз Республикасынын Маданият маалымат жана туризм министри Кайрат Иманалиев менен жолугушуп, облус аймагындагы маданият мекемелеринин ал-акыбалын сураштырып, тармактын материалдык-техникалык базасын чыңдоого, бул тармакты өнүктүрүүгө мындан ары ар тараптуу колдоолорду корсөтүү жагын өз ара макулдашышты.

Алишер ТОКСОНБАЕВ, өз кабарчы