855 Бардыгы /

ЖАЛАЛ-АБАД. Техника илимдеринин доктору, Кыргызстандын Илимдер академиясынын мүчө-корреспонденти, академик, профессор Абдырахман Мавлянов кайтыш болгонуна туптуура  бир жыл болуп, эли журту таланттуу окумуштуу, чыныгы педагогдун жаркын элесин унутпай Кербен шаарында  эстелигин орнотуп, ачылуу аземи болуп өттү.

Техника илимдеринин доктору Абдырахман Мавлянов 150дон ашык илимий  макалаларды жазган, 3 ойлоп тапкан техникалык жаңылыгы өңдүрүшкө киргизилип, патент алган. 5 монографиянын автору, 30дан ашык методикалык китептери жарык көргөн. Кыргыз элинин сыймыктуу уулу Абдырахман Мавлянов Аксы районундагы Кош-Дөбө айылында 1947-жылы төрөлүп өсүп, райондогу Успеновка 8 жылдык мектебин эң мыкты окуп бүтүп, андан ары жогорку окуу жайларында окуп билимин өркүндөткөн. 50 жылдан ашык жогорку техникалык университеттерде, институттарда эмгектенген. Ушул мезгилдердин ичинде ал өзү окуп бүткөн мектептен кол үзгөн эмес. Абдырахман агай жаштардын окуп билим алуусуна абдан көп көңүл бурган. Бекмамат Осмонов атындагы Жалал-Абад мамлекеттик университетин уюштуруу комиссиясында мүчө болуп, демилгечилердин бири болгон. Илимдин 3 докторун, 5 кандидатын, даярдап чыгарган. Эң адамгерчиликтүү, кичи пейил мыкты адам болгон. Агай өзү туулуп өскөн айылында да чоң кадыр -барктын ээси. Мектептерди, таланттуу жаштарды колдоп келген. Улуу акын Жеңижоктун китебин чыгарып элине бекер таркаткан. Мындай иштерин санай берсе арбын дейт айылдаштары. Кыргыз Республикасынын билим берүүсүнө эмгек сиңирген кызматкер, Даңк орденин кавалери, инженердик академиянын алтын медалынын, Кыргыз Республикасынын президентинин Ардак грамотасынын бир нече жолку ээси болгон. Кыргыз Республикасынын Жогорку аттестациялык комиссиясынын төрагасы  болуп иштеп, көп кадрларды өстүргөн. Таланттуу окумуштуу, чыныгы педагог, жөнөкөй асыл адамды Аксы эли унутпайт жана өсүп келе жаткан жаш муундарга өмүру өрнөк болот деп айтууга толук негиз бар.

Абдымомун КАЛБАЕВ, Аксы району