1,953 Бардыгы /

ЖАЛАЛ-АБАД. Жалал-Абад шаарынын мэри Эрнисбек Ормоков алтын сертификат жана алтын тамга алган жалал-абаддык окуучулар менен жолугушту. Анткени быйыл бул калаадан 37 бүтүрүүчү “Алтын тамга” сертификатына татыды. Ал эми жалпы республикалык тестирлөөдө дагы эки окуучу алтын сертификат алып, ондон ашык бүтүрүүчү жогорку баллды багындырды.

Алтын сертификаттын бирине Жалал-Абад шаарындагы №1-Бабкин атындагы мектептин бүтүрүүчүсү Бекжан Касымбеков татыды. Ал 223 балл топтогон. Ал эми экинчи алтын сертификатка Актан Календаров арзыды. Бул улан Жалал-Абад шаарындагы №15-Курманбек баатыр атындагы балдар лицейинин бүтүрүүчүсү. Дээрлик 220 баллды багындырды. Мектепти ийгиликтүү аякташкан бүтүрүүчүлөргө калаа башчысы Эрнисбек Ормоков мындан аркы турмушунда ак жол тилеп, буларга билим жана тарбия берген мугалимдер менен ата-энелерге дагы терең ыраазычылыгын ачыктап, ири ийгиликтери менен чын ыкластан куттуктады.

Ушуга улай бүтүрүүчүлөргө жана “Алтын тамга” артыкчылыгы менен аттестат алышкан 11 мектепке шаар мэри тарабынан акчалай сыйлыктар дагы тапшырылды. Белгилей кетчү жагдай: быйыл Жалал-Абад шаары боюнча жалпы 638 окуучу 11-классты аяктады.

Алишер ТОКСОНБАЕВ, өз кабарчы