1,686 Бардыгы /

МАЛДАРДЫ ЧЕК АРАДАН МЫЙЗАМСЫЗ АЙДАП ӨТҮҮГӨ АРАКЕТТЕНГЕНДЕР КОЛГО ТҮШҮРҮЛДҮ

БАТКЕН. Баткен облусунда Айдаркен Чек ара кызматынын өкүлдөрү мамлекеттик чек арадан бир нече малды мыйзамсыз айдап өткөрүү аракетин дароо токтотушту.

УКМКнын Мамалекеттик Чек ара кызматынын коомчулук жана ММК менен байланыш бөлүмүнүн маалыматына караганда, Кыргыз чек арачылары тарабынан Кадамжай районунун Кара-Жантак аймагында “Хундай-портер” үлгүсүндөгү эки автоунаа токтотулган. Анын үстүнө 74 баш майда жандыктар жүктөлүнүп, буларды Кыргызстандан Өзбекстандын аймагына алып өтүүгө аракет жасалды. Буга катыштыгы бар 1978-жылы туулган А.М., 1991-жылы туулган Т.Р жана 1989-жылы туулган Т.М. аттуу Кыргыз жарандары кармалышты. Тиешелүү документтер толтурулгандан кийин, кармалгандар мал жандыктары менен кошо жорукту мындан ары дыкаат иликтөө үчүн жергиликтүү компетенттүү органдардын кызматкерлерине өткөрүлүп берилди.

Мындан тышкары, ушул жылдын 27-июнунда Жалал-Абад облусунун Ала-Бука чек арасынын чек арачыларына Ала-Бука районунун Жаңы-Шаар айылынын тургуну 1987-жылы туулган М.А. коңшу мамлекеттин аймагына өткөн жылкыны кайтарып берүүгө жардам берүү өтүнүчү менен кайрылган. Кыргызстан менен Өзбекстандын чек ара өкүлдөрү өз ара телефон аркылуу сүйлөшүүлөрдү жүргүзүп, жыйынтыгында жылкы ээсине кайтарылды.

Алишер ТОКСОНБАЕВ, өз кабарчы