1,314 Бардыгы /

ОШ. Алай жергесинде Алымбек датканын 220, Курманжан датканын 210 жана Токтогул Ажыбаев атындагы Алай музыкалык-драма театрынын 75 жылдыгына карата уюштурган республикалык “Тоо театрларынын I фестивалы” өз ишин аяктады.

Аталган фестиваль Ош облусунун Алай районундагы Гүлчө айылындагы Токтогул Ажыбаев атындагы Алай музыкалык-драма театрынын алкагында тарыхый инсандардын жана тоолуу жердеги профессионал театрдын мааракесине арналып өттү. Салтанатка катышкан Маданият жана маалымат министринин орун басары Салтанат Аманова аталган иш-чара өз ара тажрыйба алмашуу багытын гана көздөгөндүгүн баса белгиледи. Анын баамында, муну салт катары мындан ары башка аймактарда дагы өткөрүп туруу пландаштырылууда.

-Мындай достук мамилени бекемдөө жана профессионалдык театр искусствосун аймактарга жеткирүү учурдагы Маданият министрлигинин бирден-бир приоритеттүү багыты, — деп агынан жарылды Маданият жана маалымат министринин орун басары Салтанат Аманова.

Республикалык “Тоо театрларынын I фестивалы” Капар Медетбеков атындагы Талас облустук музыкалык-драма театры  койгон Төлөгөн Касымбековдун “Кел-Кел” спектакли менен тушоосун кести. Буга дейре Өзбекстандын Наманган облустук музыкалык-драма театры, Султан Ибраимов атындагы Ош улуттук драма театры, Калык Акиев атындагы Жумгал музыкалык драма театры, Токтогул Ажибаев атындагы Алай музыкалык драма театры, Капар Медетбеков атындагы Талас облустук музыкалык драма театры, Муратбек Рыскулов атындагы Нарын облустук академиялык музыкалык драма театры жана Касымалы Жантөшев атындагы Ысык-Көл облустук музыкалык драма театрларынын жүрүшү менен башталып, муну заманбап концерттик программа дагы коштоду.

Аталган иш-чаранын жүрүшүндө Капар Медетбеков атындагы Талас облустук музыкалык-драма театры Төлөгөн Касымбековдун “Кел-Кел”, Муратбек Рыскулов атындагы Нарын облустук академиялык музыкалык драма театры драматург Иманалиевдин “Актриса”,  Өзбекстандын Наманган облустук музыкалык драма театры Өзбек эл жазуучусу Саид Ахматтын “Хасан Хусан” чыгармасынын негизинде “Таниш нусхалар”, Касымалы Жантөшев атындагы Ысык-Көл облустук музыкалык драма театры драматург Касымбековдун “Кел-Кел” романынын негизинде инсценировкаланган “Кара көлөкө” спектклдерин элеттик көрөрмандарга тартуулашты.

Республикалык “Тоо театрларынын I фестивалын” Алай райондук мамлекеттик акимчилиги жана Токтогул Ажыбаев атындагы Алай музыкалык драма театры биргеликте уюштурушту.

Алишер ТОКСОНБАЕВ, өз кабарчы