1,941 Бардыгы /

ЖАЛАЛ-АБАД. Кечээ, 24-майда “Жылдын мыкты мугалими-2022” кароо-сынагынын облустук баскычы жыйынтыкталып, Жалал-Абад шаарындагы Б.Осмонов атындагы №5 мектеп-гимназиясынын химия мугалими, 29 жаштагы Максат Абилов жеңишке жетти.

Шаардык билим берүү бөлүмүнүн башчысы Рысбек Калчаев билдиргендей, облустук турдун жеңүүчүсү Максат АбиловгоАнталияга эс алып келүүгө жолдомо тапшырылды.

“Максат Абилов эми “Жылдын мыкты мугалими-2022” сынагынын республикалык баскычында Жалал-Абад облусунун намысын коргойт”, дейт Р.Калчаев.

Максат Абилов 6 жылдан бери мугалимдик кесипти аркалап келет. Бул убакыт аралыгында анын 11 окуучусу химия сабагынан предметтик олимпиаданын шаардык баскычында алдыңкы орунду камсыз кылса, алардын ичинен экиси облустук олимпиадада байгелүү орунду камсыздаган.

Эске салсак, “Жылдын мыкты мугалими-2022” кароо-сынагынын шаардык баскычынын байге фондуна Жалал-Абад шаардык мэриясы тарабынан 800 миң сом акча каражатын бөлүнүп, баш байгеге автоунаа коюлган.