837 Бардыгы /

ЖАЛАЛ-АБАД. Бүгүн, 24-октябрда К.Ш. Токтомаматов атындагы Эл аралык университеттин (ЭАУ, Жалал-Абад ш.) чоң жыйындар залында I курста билим алгандарга студент наамын ыйгаруу салтанаты өткөрүлдү.

ЭАУнун кесиптик багыт берүү жана коомчулук менен байланыштар кызматы маалымдагандай, салтанаттын башында ЭАУнун ректораты I курс студенттерин алардын алгачкы студенттик майрамы менен куттуктап, алардын өкүлдөрүнө символикалык студенттик билет, символикалык сынак китепчесин жана ЭАУнун билим ачкычын тапшырды. Андан кийин ЭАУнун маданий-эстетикалык борбору жана ЭАУнун жаштар иштери боюнча комитети университеттин студенттик активинин башын бириктиришип, майрамдык концерт тартуулашты. Концертте окуу жайдын мыкты ырчылары шаңдуу ырларды ырдап, бий топтору улуттук жана заманбап бийлерди бийлеп,  тамашакөйлөр жана амалкөйлөр топтору (КВН командалары) учкул тамашаларды тартуулашты. Жалпысынан I курстагыларга студент наамын ыйгаруу салтанаты жогорку уюшкандыкта жана ЭАУнун мыкты салттарында өткөрүлдү. ЭАУнун  ректораты биринчи курстарынын студенттерин студент наамынын ыйгарылышы менен куттуктап, окууларына албан-албан ийгиликтерди каалады.