894 Бардыгы /

ЖАЛАЛ-АБАД. Жалал-Абад облусунда “Бир айыл – бир продукт” долбоорун ишке ашыруу максатында түзүлгөн Бренд комитетинин отуруму өткөрүлдү.

Отурумда калыстар тобуна облус аймактарындагы 7 өндүрүүчүнүн 10 продукциясынын түрү коюлуп, даамы, курамы, даярдоо ыкмалары, сырткы жасалгалоосуна өз бааларын беришти. Анда азыктардан табигый түрдө даярдалышына өзгөчө маани берилди. Иш-чарага Кыргыз Республикасынын Президентинин Жалал-Абад облусундагы ыйгарым укуктуу өкүлүнүн биринчи орун басары Мамасалы Акматов, долбоордун жетекчиси Харагучи Акихиса, жергиликтүү бийлик өкүлдөрү жана жеке ишкерлер катышты.

“Бир айыл – бир продукт” долбоору 2007-жылдан бери пилоттук негизде Кыргыз Республикасынын Экономика жана Коммерция министрлиги жана Япониянын Эл аралык кызматташтык агенттиги (JICA) менен ишке ашырылып келе жатат. Долбоор Жалал-Абад облусунда 2018-жылдан тарта жумушун баштаган. Анын негизги максаты, региондордогу жергиликтүү калктын турмушун жакшыртуу, ошондой эле айыл чарбасын туруктуу өнүктүрүү, жарандарды жумуш менен камсыз кылуу, ата-мекендик продукциялардын экспортун көбөйтүүгө багытталган.

Бренд комитеттин сынына коюлган 7 продукциянын баары колдоо таап, атайын сертификаттар тапшырылды. Облус башчысынын биринчи орун басары жергиликтүү бийлик жетекчилерине, ишкерлерди ар тараптуу колдоого алуу зарылдыгын белгиледи.