1,416 Бардыгы /

Кыргызстанда мектептерде алдыдагы суук аба ырайына байланыштуу кышкы каникул 16-январга чейин узартылды. Бул тууралуу Билим берүү жана илим министрлигинен билдиришти.

Маалыматка караганда, кышкы каникулга кошулган бул күндөрдү балдар кийин окушат. Министрликтин басма сөз катчысы Нуржигит Мырзабековдун айтымында, учурда каникулдун узартылышы боюнча буйрук даярдалууда. Мектеп окуучулары кышкы эс алууга 2022-жылдын 30-декабрында тарашкан. Окуу планына ылайык, мектептерде сабактар 11-январдан тарта жанданышы керек болчу. Бирок Өзгөчө кырдаалдар министрлиги шашылыш билдирүү таратып, өлкө аймагында катуу суук болорун эскерткен. Синоптиктердин маалыматына ылайык, 11-январда аба ырайы кескин өзгөрүп, бир нече күн бою аймактарда абанын күндүзгү температурасы -20 градустун тегерегинде, тоолордо -30га чейин болот.

Кыргыз Республикасынын Билим берүү жана илим министрлиги Кыргыз Республикасынын Саламаттык сактоо министрлигинин сасык тумоо жана респиратордук вирустук инфекция ооруларынын андан ары жайылышына жол бербөө сунушунун жана Өзгөчө кырдаалдар министрлигинин аба ырайынын температурасынын кескин төмөндөшүнүн күтүлүүчү шарттары боюнча маалыматынын негизинде окуучулардын кышкы каникулун 2023-жылдын 15-январына чейин узартуу жөнүндө буйрук чыгарды.

Кыргыз Республикасынын Билим берүү жана илим министрлигинин 2022-жылдын 5-августундагы № 1529/1 буйругу менен бекитилген “2022-2023-окуу жылына карата Базистик окуу пландарынын түшүндүрмө катынын” “Уюштуруу иш-чаралары” бөлүгүнө өзгөртүү жана толуктоолор киргизилет:

– кышкы – 17 календардык күн: 2022-жылдын 30-декабрынан башталып, 2023-жылдын 15-январына чейин жарыяланат, сабактар 2023-жылдын 16-январынан башталат;

– жазгы – 5 календардык күн: 2023-жылдын 22-мартынан башталып, 26-мартына чейин жарыяланат, сабактар 2023-жылдын 27-мартынан башталат.

Мектепке чейинки билим берүү уюмдары санитардык-эпидемиологиялык көзөмөлдөө органдарынын санитардык көрсөтмөлөрүнө ылайык иш жүргүзөт.

Эске салсак: 15-декабрдан тарта республика боюнча мектеп окуучулары онлайн окутууга 24-декабрга чейин өтүшкөн, бирок андан кийин карантин 28-декабрга чейин узартылган.

WWW.