1,596 Бардыгы /

ОШ. Кыргызстандын Коргоо министрлигинин аскер бөлүктөрүнүн биринде кызмат өтөп жүрүп, кызматына жүйөөсүз эле 34 күн келбей койгон аскер кызматкерине акыры сот өкүмүн угузду.

 Жогорку соттон кабарлашкандай,  аталган иш Ош шаардык сотунда каралган. К. Ы. (аты өзгөртүлдү) аттуу жаран былтыр сентябрь айында Коргоо министрлигинин аскер бөлүктөрүнүн биринин инженердик-сапердук ротасына улук сапер болуп дайындалган. Кызмат өтөп жүрүп, 2022-жылдын 2-ноябрынан тартып 6-декабрына дейре жалпы жонунан 34 күн эч себепсиз кызмат ордуна келген эмес.

Айыпталуучу өз көрсөтмөсүндө, күнөөнү толук мойнуна алып, а түгүл жасаган ишине өкүнүп жаткандыгын моюндады. Ал сотто билдиргендей, сентябрь айында 150 миң сом карыз болуп калып, насыясынан кутулуу максатында башка жакта иштеп жүргөн. Ага байланыштуу кызмат ордуна таптакыр келген эмес. Ошондой эле сотто ага жеңил жаза берилишин абдан суранды.

Ошентип, сооттун өкүмү менен айыпталуучу бир жылга эркиндигинен ажыратылды. Ошол эле учурда ага пробациялык чара колдонулуп, ал бир жыл деп белгиленген. Ага байланыштуу айыпталуучу эркиндигинен ажыратуу жазасынан бошотулду.

Алишер ТОКСОНБАЕВ, өз кабарчы