2,394 Бардыгы /

ОШ. Ош шаардык билим берүү башкармалыгынын кызматкерлеринин үстүнөн кылмыш иши козголду. Бул туурасында Башкы прокуратурадан билдиришти.

Маалыматка караганда, Ош шаардык билим берүү башкармалыгында мамлекетке 1 миллион 905 миң 987 сомдук ири өлчөмдө зыян келтиргендиги аныкталды. Атайын текшерүүнүн жүрүшүндө аталган башкармалыктын кызмат адамдары кызмат абалынан кыянаттык менен пайдаланып, башкармалыкта жана эч бир мектепте иштебеген тааныштарынын наамына ачылган банктык карталарына жалпы 1 миллион 905 миң 987 сом акча каражатын эмгек акы үчүн деп мыйзамсыз которушуп, өздөрүнүн пайдасына  жок кылышкандыгы тастыкталды.

Ошентип, дыкаат текшерүүнүн жыйынтыгында Ош шаарынын прокуратурасы тарабынан Кылмыш-Жаза Кодексинин 337-беренеси (“Кызмат абалынын кыянаттык менен пайдалануу”) менен кылмыш иш козголуп, ушул тапта тергөө амалдары жүргүзүлүүдө.

Алишер ТОКСОНБАЕВ, өз кабарчы