1,158 Бардыгы /

ЖАЛАЛ-АБАД. Бүгүн, 3-март күнү, Жалал-Абад шаарында мамлекеттик туу жана ак калпак күнүнө карата майрамдык жөө жүрүш өттү. Ага облустук жана шаардык мекеме-ишканалардын кызматкерлери, жогорку жана орто окуу жайлардын студенттери катышты.

Саамалык борбордук аянтта уланып, иш-чарага Кыргыз Республикасынын Президентинин Жалал-Абад облусундагы ыйгарым укуктуу өкүлү Абсаттар Сыргабаев, шаар мэри Эрнисбек Ормоков, жергиликтүү кеңештин төрагасы Нуртилек Орозбаев жана калаа тургундары катышты.

Президенттин ыйгарым укуктуу өкүлү майрам катышуучуларын куттуктап, улуттун жана мамлекеттүүлүктүн негизи болгон символикалардын орду чоң экенин белгиледи.

“Кылымдарды карытып келе жаткан кыргыз мамлекетибиз, байыркы элибиз үчүн туубуз өзгөчө мааниге ээ. Ал уюткулуу элибиздин басып өткөн жолун, ата-бабаларыбыздын каармандыгын айгинелейт. Туубуз түрдүү эл аралык сынактарда, маданий жана спорттук мелдештерде жогору желбирөөсү бизге ар дайым сыймык жаратып, мекенге болгон сүйүүбүздү арттырат.

Ал эми, Кыргыз элинин өз алдынча улут экенин көрсөткөн символикаларыбыздын бири бул – Ак калпак. Андыктан улуттук баш кийимибиз — Ак калпак кыргыз баласынын башынан түшпөсүн! Эгемен өлкөбүздүн желеги кылымдарга желбирей берсин! Асманыбыз ачык, түндүгүбүз бийик болсун!,–деди А. Сыргабаев.

Майрамдык иш-чара аскердик парад жана концерттик программа менен коштолду.