1,275 Бардыгы /

ЖАЛАЛ-АБАД. Жалал-Абад ОИИБдин начальниги Базар-Коргондо ККМ (көзөмөл-кассалык машинаны) боюнча түшүндүрүү иштерин жүргүздү.

Жалал-Абад ОИИБдин басма сөз кызматы билдиргендей, ОИИБдин начальниги Жеӊишбек Абитов Базар-Коргон районунун тургундары менен жолугушуп, базарларда, соода маркеттеринде ККМ боюнча түшүндүрүү иштерин жүргүздү. Жолугушуу учурунда жергиликтүү ишкерлерге көзөмөл-кассалык машинаны колдонуу зарылдыгын айтып, өлкөбүздүн экономикасына салым кошууга чакырды. Ар бир жаран ишкердиктен түшкөн пайданы жашырбашы керектигин айтып, салыкты өз убагында төлөө зарылдыгын эскертип, мамлекеттин казынасына түшкөн акча каражаты максаттуу пайдаланылып, коопсуздук, эмгек акы, социалдык маселелерди чечүүдө колдонулуп келе жатканын белгиледи.

Мындан сырткары милицияга байланыштуу кандай гана маселе болбосун жеринде чечүүгө аракет кыларын, жарандардын арыз-даттануулары милициянын көчмө кабылдама унаасында дагы кабыл алынарын айтты.

Ички иштер министри милициянын генерал-лейтенанты Улан Ниязбековдун 2023-жылдын 3-февралындагы жети багыттагы приоритеттүү тапшырмаларына токтолуп, аны ишке ашырууда милиция кызматкерлери талыкпастан эмгектене тургандыктарын белгиледи. Ошондой эле жол эрежелерин так сактоого, адам өмүрү менен коштолгон кырсыктардын алдын алууга, спирт ичимдигин ичип унаа башкарбоого чакырды.

Ал эми Базар-Коргон РИИБдин начальниги Ассрор Тантиев жарандарды кылмыштуулуктун, үй-бүлөлүк зордук-зомбулуктардын, ысырапкерчиликтин алдын алууда биргелишип иштөөгө үндөдү.