861 Бардыгы /

ОШ. Кыргызстандын Түштүк башкалаасындагы Захириддин Бабур атындагы Ош мамлекеттик академиялык Өзбек музыкалык драма театры капиаталдык ремонттон кийин гана кайрадан пайдаланууга тапшырылды.

Аталган иш-чарага Кыргыз Республикасынын министрлер кабинетинин төрагасынын орун басары Эдил Байсалов, Өзбекстандын маданият жана туризм министри Озодбек Назарбеков, маданият, маалымат, спорт жана жаштар саясаты министринин биринчи орун басары Кайрат Иманалиев, ТүркСойдун Башкы катчысы Султан Раев, Ош шаарынын мэри Бакытбек Жетигенов, президенттин Ош облусундагы ыйгарым укуктуу өкүлү Элчибек Жантаев жана эки өлкөнүн маданият өкүлдөрү дагы катышышты.

Ачылыш аземинин алкагында Ош шаардык маданият башкармалыгынын жана театрдын чыгармачыл жамааты тарабынан атайын концерттик программа тартууланды. Ошондой эле эки өлкөнүн маданият ишмерлерине, маданияттын өнүгүшүнө жана театрды оңдоп-түзөө иштерине кошкон салымы үчүн Ардак грамоталар дагы тапшырылды.

Аталган иш-чара акын, саясатчы жана колбашчы Захириддин Бабурдун тарыхый окуяларынын негизинде коюлган «Айролик» спектакли менен жыйынтыкталды. Белгилей кетчү жагдай: аталган театрды оңдоп-түзөө иштери 2021-жылдын сентябрь айында башталган. Каржылоо Өзбекстан Республикасы тарабынан жүргүзүлдү.

Алишер ТОКСОНБАЕВ, өз кабарчы