1,515 Бардыгы /

          ОШ. Кыргызстандын Түштүк башкалаасынджагы «Өчпөс от» мемориалдык комплексинде «Эскерүү оту» Эл аралык эстафетасынын алкагында Өчпөс отту жагуу иш-чарасы өткөрүлдү. Аны жагууга Улуу Ата Мендик согуштун ардагери Касымбай Жолдошев, Бүткүл орусиялык «Элдик фронт» коомдук кыймылынын борбордук штабынын мүчөсү, теле алып баруучу Юлия Барановская, теле алып баруучу жана блогер Екатерина Шугаева катышышты.

          Аталган иш-чарага ошондой эле Ош шаарынын мэринин орун басары Нурбек Кадыров, президенттин Ош облусундагы ыйгарым укуктуу өкүлүнүн орун басары Эрнис Толтоев, Орусиянын Ош шаарындагы башкы консулу Андрей Бибишев, Кыргыз Республикасындагы орус кызматташтыгынын өкүлү Альберт Зульхарнеев, Оштогу Орус үйүнүн өкүлдөрү, Кыргыз Республикасынын Куралдуу күчтөрүнүн аскерлери, Ооган жана Баткен окуясынын ардагерлери, Ички иштер министрлигинин өкүлдөрү, Ош шаарындагы коомдук, билим берүү, спорт жана башка уюмдардын өкүлдөрү, ошондой эле шаар тургундары катышышты.Бул иш-чаранын алкагында жыйын-реквием дагы өткөрүлүп, Улуу Ата Мекендик согуштун ардагери Касымбай Жолдошев мемориалдык комплекстеги Өчпөс отту күйгүздү. Андан соң Ош шаарынын мэринин орун басары Нурбек Кадыров шаар башчысы Бакытбек Жетигеновдун жана жеке өзүнүн атынан Улуу Жеңиштин 78 жылдыгы менен куттуктап, фронттогу баатырларды эскерүү акциясы өсүп келе жаткан муун үчүн маанилүү экендигин баса белгиледи. Соңунда Түбөлүк оттун бөлүкчөлөрү өлкөнүн башка шаарларына өткөрүп берилип, Маданият башкармалыгы тарабынан даярдалган майрамдык музыкалык программа тартууланды.

          Эскерте кетчү жагдай: Ош шаарынын мэриясы тарабынан уюштурулган “Эстелик оту” акциясы алгачкы жолу 2022-жылы өткөрүлгөн. Белгилей кетээрибизсек, белгисиз жоокердин Москвадагы күмбөзүндөгү Өчпөс оттун бир бөлүгү быйыл биринчи жолу Ош шаарына түз алып келинди. Аны Ошко Москва Кремлинин жанында жайгашкан белгисиз жоокердин мүрзөсүнөн Өчпөс оттун бир бөлүгүн Ош шаарына акциянын катышуучулары бүткүл орусиялык «Элдик фронт» коомдук кыймылынын борбордук штабынын мүчөсү, теле алып баруучу Юлия Барановская (Биринчи каналдагы «Мужское – Женское” программасы), теле алпаруучу жана блогер Екатерина Шугаева (НТВ телеканалында «Биз жана илим» автордук программасынын алып баруучусу) жеткиришти.

Алишер ТОКСОНБАЕВ, өз кабарчы